Barcelona nuk fal as Interin. Katalanasit kanë fituar me rezultatin e pastër 2-0, duke marrë fitoren e tretë në grup dhe kreun e atij B. Me mungesën e Lionel Messit, zëvendësuesi i "pleshtit", Rafinha zhbllokoi takimin në minutën e 32-të.

Braziliani lëvizi mirë në zonën e vogël dhe shfrytëzoi në maksimum një top të hedhur nga Suarez dhe me të majtën e kishte të lehtë të tundte rrjetën. Goli i sigurisë erdhi vetëm në minutën e 83-të, me Alba autor të golit. Me këtë rezultat Barcelona ngjitet në kuotën e 9 pikëve, e ndjekur nga Inter me 6 të tilla.

Fitore arriti dhe Borussia Dortmund, që mposhti me "poker" 4-0 Atletico Madrid. Guerriero, me dopietë dhe Ëitsel e Sancho ishin autorët e golave dhe i japin gjermanëve kreun e grupit A në kuotën e 9 pikëve.

Me të njëjtat shifra fitoi dhe Liverpool i cili mposhti Crvena Zvezda. Fitore të rëndësishme arriti dhe Porto, e cila fitoi në transfertë 3-1 ndaj Lokomotiv Moskë. Në barazim u mbyll takimi mes PSG dhe Napolit, me francezët e italinët që barazuan me shifrat 2-2. Pa gola u mbyll takimi mes Galatasaray dhe Schalke 04.