Trajneri i kombëtares së futbollit, Christian Panucci, ka vendosur që të thërrasë një tjetër futbollist për grumbullimin e ndeshjeve me Skocinë dhe Uellsin, pasi ka parë të reduktohet për shkak të dëmtimeve apo pamundësisë për të udhëtuar numrin e lojtarëve që kishte planifikuar të afronte për këto sfida. Dëmtimi i Ramadanit si dhe mosardhja e Sadikut, Balliut e së fundmi Durmishajt, ka bërë që trajneri të mos ketë një numër të mjaftueshëm lojtarësh për të përballuar si duhet ndeshjen me Skocinë ku mungojnë edhe Hysaj e Basha për pezullim, ndërsa Manaj nuk është në maksimumin e tij.

Kështu, Panucci ka kthyer sytë nga një tjetër element që njeh duke i dërguar ftesë mesfushorit ofensiv Egli Kaja. Ky i fundit ishte edhe në grumbullimin e tetorit por nuk u aktivizua në sfidat ndaj Jordanisë dhe Izraelit për asnjë minutë.

Ndonëse sot trajneri deklaroi se lojtari ishte lënë jashtë për arsye mosaktivizimi me klubin e tij (3 ndeshje për një total prej 65 minutash që në shtator), ai ka menduar t’i japë një tjetër shans lojtarit i cili luan në krahun e djathtë e mund të shërbejë si alternativë në rast emergjence.