Në një kohë emergjence në krahun e djathtë dhe në qendrën e mbrojtjes, Christian Panucci mendoi kandidatin perfekt dhe goditjen e madhe që mund t’i sillte ekipit kombëtar cilësi dhe një lider të ri. Tekniku italian kishte pikasur prej kohësh në Turqi, mbrojtësin e Besiktasit, Necip Uysal. Futbollisti i gjigantëve turq kishte deklaruar hapur prejardhjen e tij shqiptare dhe shpeshherë në “Instagramin” e tij intrigonte me postime që shfaqte hapur simpatinë e tij për flamurin kuqezi e shqiponjën dykrenare.

Në FSHF mblodhën forcat dhe nisën punën për ta bindur në këtë moment kyç që ndodhemi. Burime të sigurta të Telesport pranë Federatës Shqiptare të Futbollit tregojnë se bisedimet për të bindur 27-vjeçarin kishin nisur që prej 2-3 muajsh në mënyrë intensive. Mbrojtësi që luan në krahun e djathtë, qendër dhe si mesfushor defensiv u fut në kontakte direkte me Shqipërinë dhe pranoi të niste bisedimet.

Pengesat ishin të mëdha, pasi fillimisht Federata Turke e Futbollit kërkonte dëmshpërblim duke qenë se Uysal ka luajtur me moshat e këtij shteti. Lojtari i druhej ndonjë mase që mund të merrnin turqit dhe u step pak. Megjithatë, shqiptarët këmbëngulën dhe kishin detajuar planin deri në atë pikë sa mendonin që të fusnin në bisedime direkte kryeministrin Edi Rama me kryeministrin turk Recep Tayyip Erdoğan, në rast se futbollisti i Besiktasit do të pranonte ftesën e Shqipërisë.

Në fund, kur Federata Shqiptare e Futbollit po priste një lajm të mirë nga futbollisti 27-vjeçar ai u step dhe dha përgjigje negative. “Do të pres Turqinë”, – ishin fjalët e tij në refuzimin ndaj kombëtares shqiptare. Të njëjtat burime theksojnë për Telesport se në bisedime me futbollistin ishte dhe Kosova, por përgjigjja ishte negative dhe për Përfaqësuesen. Uysal është produkt i ekipit turk të Besiktas-it, megjithatë nuk ka patur një vazhdimësi të mirë. Këtë sezon ka luajtur 4 ndeshje, 2 si titullar dhe 10 herë ka qëndruar në stol. Telesport