Shqipëria ka udhëtuar drejt Andorrës për tu ndeshur me kombëtaren e shtetit të vogël, në kuadër të kualifikueseve të Euro 2020. Pas shkarkimit të Christian Panuccit, skuadra kuqezi është marrë në dorë nga Sulejman Mema dhe Ervin Bulku, të cilët kanë caktuar edhe 11 titullare për këtë duel.
Dyshja e teknikëve ka surprizuar me zgjedhjet e tyre, duke rikthyer skemën me dy sulmues. Myrto Uzuni dhe Armando Sadiku do të udhëheqin sulmin e kuqezinjve, ndërkohë që mesfusha do të jetë e tëra e rinovuar. Kaçe, Basha, Grezda dhe Xhaka do të ndërtojnë këtë repart. Në mbrojtje konfirmohet gjithçka, me Hysaj e Aliji nga krahët, e me Djimsitin e Ismajli në qendër. Porta do të jetë pronë e Etrit Berishës.
