Ka ndërruar jetë në moshën 35-vjeçare ish sulmuesi i Arsenalit, Real Madridit dhe disa skuadrave tjera evropiane, Jose Antonio Reyes.

Reyes u shua këtë të shtunë pas një aksidenti me makinë në qytezën e lindjes Utrera në Sevija. Shkaqet e incidentit të ndodhur në dalje të Utrera-s mbeten ende të panjohur dhe hetimet pritet të hedhin më shumë dritë rreth asaj çka ka ndodhur.

35-vjeçari luante së fundmi në radhët e Extremadura, skuadër që militon në Segunda Divizion.

I cilësuar nga “AS”, si një lojtar mitik i futbollit spanjoll, ai ka luajtur në klube si Sevilla, Real Madrid, Atlético, Espanyol dhe Córdoba. Përveç kësaj, ai ka veshur fanellën e Arsenalit për tre sezone dhe Benfica-s. Ai gjithashtu shkoi në Kinë, ku luajti te Xinjiang Tianshan.