Vazhdojnë zërat që flasin për largimin e Gareth Bale nga Reali i Madridit. Pasi u fol për një kalim te Manchester United, emri i sulmuesit uellsian është lidhur orët e fundit me atë të Bayern Munchen.

Por as vet Bale nuk e përjashtoi në mënyrë kategorike një mundësi të tillë.

“Në futboll, kurrë mos thuaj kurrë!”, u shpreh Bale në një intervistë për “Sport Bild”.

“Për momentin jam i kënaqur në Madrid dhe po i gëzohem futbollit. Bajreni ka një skuadër fantastike dhe një ndër më të suksesshmet në Europë. Për mua është një nder që ma lidhin emrin me Bajrenin, por tani jam futbollist i Realit të Madridit”, tha uellsiani.

Bale pranoi se do të donte të aktivizohej më shumë nga trajneri Zinedine Zidane.

“Për të qenë i sinqertë, unë dua gjithnjë të luaj, sepse dua të shënoj më shumë gola”, tha Bale, i cili u transferua te Reali në vitin 2013, për vlerën e 101 milionë eurove, duke u bërë futbollisti më i shtrenjtë në atë periudhë.