Një revistë hungareze botoi të enjten më shumë se 200 emra të njerëzve që pretendohet se mund të jenë pjesë e një grupi që kryeministri Viktor Orban i quan “mercenarë” të paguar nga filantropisti miliarder amerikano-hungarez George Soros për të rrëzuar qeverinë.

Ata që janë në listën e publikuar, janë pjesë e organizatave si Amnesty International, Mbikëqyrësi anti-korrupsion Transparency International, avokatët e refugjatëve, gazetarët hulumtues, fakultete dhe zyrtarë të Universitetit të Evropës Qendrore i financuar nga Soros, shkruan New York Post.

Figyelo është një revistë biznesi mjaft e respektuar.

Orban u rizgjodh në një mandat të katërt si udhëheqës i Hungarisë në zgjedhjet parlamentare të së dielës (8 Prill). Pak javë përpara votimit, ai u tha një turme me dhjetëra mijëra mbështetës që, pas zgjedhjeve do të kërkoheshin “ndryshime morale, politike dhe ligjore”.

Orban, i cili e bazoi fushatën e tij në demonizimin e emigrantëve, fajëson Soros dhe organizatat e mbështetura nga Fondacionet e tij të Shoqërisë së Hapur se duan të lejojnë mijëra emigrantë në Hungari.

Qeveria hungareze nën udhëheqjen e Viktor Orban është padyshim anti-George Soros.

Muajin e kaluar, Orban tha se qeveria i njihte emrat e rreth 2.000 anëtarëve të “ushtrisë mercenare Soros”, të paguar për “të punuar për rrëzimin e qeverisë”.

“Ne e dimë saktë se kush janë këta njerëz, ne i dimë emrat … si dhe pse ata po punojnë për ta transformuar Hungarinë në një vend imigrant”, tha Orban më 30 mars në radion shtetërore.

Orban tha të martën se paketa legjislative “Stop Soros” e paraqitur nga qeveria përpara zgjedhjeve ishte miratuar nga votuesit. Ligjet e reja, të cilat mund të miratohen në maj, mund të pengojnë aktivitetet e grupeve qytetare që punojnë me azilkërkuesit dhe refugjatët.

“Ndihemi të autorizuar për të miratuar ligjin,” tha Orban.

Andras Petho, një gazetar investigues në faqen e internetit Direkt36.hu dhe një prej emrave të përfshirë në listë nga Figyelo, tha se ndërsa publikimi i tij ishte mbështetur pjesërisht nga fondacioni i Soros, shumica e të ardhurave të saj erdhën nga fondet e projekteve dhe nga lexuesit hungarezë.

Një poster në Budapest thotë: “Soros do të vendoste miliona nga Afrika dhe Lindja e Mesme. Stop Soros! “.

“Ne kurrë nuk kemi pasur ndonjë kërkesë apo pritshmëri të shprehur rreth raportimit tonë apo tregimeve nga fondi Soros”, tha Petho, duke vënë në dukje se donatorët e Direkt36 ishin të listuara në faqen e saj të internetit.

“Në vitin 2016, gjatë një fjalimi në parlament, Kryeministri Orban madje citoi informacionin nga një prej raporteve tona mbi marrëdhëniet financiare të një partie opozitare”, tha Petho.

Direkt36 shkruan rregullisht për marrëdhëniet e biznesit të familjes dhe aleatëve të Orbanit, ndërsa gjithashtu raporton mbi aktivitetet e biznesit dhe interesat e qeverisë dhe politikanëve të opozitës.