Banorët e fshatit Gur të njësisë administrative Remas thonë se janë në prag katastrofe mjedisore dhe për këtë fajësojnë hedhjen e mbeturinave nga Bashkia Divjakë në një nga zonat e  mbrojtura, 500 metra prej lagunës së Karavastasë.

Prej më shumë se 4 vitesh bashkia Divjakë shkarkon këtu kamionët me mbetjet e grumbulluara në të gjithë zonën e Divjakës.

Ujërat që kalojnë nëpër plehra nga kodra zbresin në tokat e fermerëve e më pas përfundojnë në lagunë nëpërmjet kanaleve. Banorët thonë se kjo ndikon në cilësinë e kulturave bujqësore. Për më tepër që është ndotur laguna dhe kanë filluar të ngordhin peshqit madje edhe pelikanët e rrallë.

Hedhja e mbeturinave në këtë zonë është e paligjshme. Në vitin 2014 këshilli i komunës Remas vendosi që ta kthente këtë vend në pikë grumbullimi për mbetjet e bizneseve por nuk u miratua nga ana e ish nënprefektit të Lushnjës Ilir Dervishi, pasi komuna nuk e kishte në pronësinë e saj këtë vend.