Nga Ermion Dulla
Askush nuk di të tregojë në këto ditë të tejnxehta, shkakun e rritjes së çmimit të biletës në linjën Kukës – Tiranë. Të traumatizuar nga rritja e çmimit të mallrave të konsumit, kuksianët heshtin të tejlodhur nga varfëria që është në rritje. Heshtin sepse e ndjejnë veten krejtësisht të braktisur. Aq sa vetë thonë se, “që pas zgjedhjeve të vitit të kaluar, asnjë prej deputetëve të tyre, bile as Mimi Kodheli nuk janë dukur në Kukës. E ndjejmë veten krejtësisht të braktisur, a thua nuk jemi shtetas të këtij gjysmë shteti shqiptar”,- thonë të nervozuar kuksianët. Asnjë nuk di të të japë shkaqet e vërteta të ngritjes së çmimit të biletës nga 400 lekë në 500 lekë. Drejtues të shoqatës së vetme të transportit të udhëtarëve ndërqytetës thonë se, “ngritja e çmimit është brenda ligjit (pika ligjeve të këtij gjysmë shteti qesharak që kemi ne shqiptarët). Por e kemi ulur në 400 lekë për shkak të konkurrencës së paligjshme. Por edhe rritja e çmimit të karburantit ka ndikuar në rritjen e çmimit”.
Justifikime aq qesharake sa i evidentojnë drejtuesit e së vetmes shoqatë se janë gjysmakë. Të tillë duken në sytë e bashkëqytetarëve të tyre sepse, “ç’konkurrencë kanë pasur ndonjëherë përderisa në këtë qytet ka vepruar dhe vepron vetëm një shoqatë. Pra, ajo bën konkurrencë me vetveten dhe me askënd tjetër. Një justifikim idiot që i ka bërë kuksianët të nervozohen edhe më tepër. Edhe justifikimi tjetër i rritjes së çmimit të karburantit është edhe më i çuditshëm, pasi çmim i karburantit prej kohësh në këtë Shqipëri është i lartë në krahasim me vendet e tjera përreth, por ai prej kohësh nuk ka ndonjë rritje në Shqipëri, siç përpiqen të llomotisin përfaqësuesit e së vetmes shoqatë të transportit të udhëtarëve ndërqytetës.
Sa thamë më sipër, është evidente se rritja e çmimit në këto ditë gushti është më shumë se abuzive. Duke shfrytëzuar edhe rritjen e lëvizjes së shumë banorëve drejt bregdetit për pushime.
Rritja e çmimit me 100 lekë dhe indiferentizmi që po tregohet për këtë rritje të pajustifikueshme nga Bashkia dhe strukturat e tjera shtetërore është më shumë se e çuditshme. Po ashtu edhe indiferentizmi i shoqatave të biznesit që vetëm pak muaj më parë ngritën gjithë komunitetin kundër vendosjes së traut në rrugën e Kombit. Një indiferentizëm idiot – tinzar që po shkakton një përçarje mes vetë komunitetin, përfaqësues të të cilit pak muaj më parë u ngritën në revoltë siç kërkoi biznesi, bile disa përfaqësues të komunitetit kryen edhe disa muaj burg. Janë këta që ndjehen më shumë se të braktisur, ndjehen të mashtruar. Sepse për ta askujt nuk I shkon mendja t’u vijë në ndihmë. “Për ne fukarenjtë, askush nuk do t’ia dijë. Disa prej nesh as detin nuk e kanë parë me sy, po ky gjysmë shteti ynë nuk na ndërton as një mbikalim për të shkuar në brigjet e liqenit, ku jemi mësuar t’i kalojmë pushimet”- thonë gjithë zemërim shumë prej kuksianeve.
Pas 40 ditësh do të nisë lëvizja në autostradë përmes pagesës. Kjo e bën më të çuditshme rritjen e çmimit të biletës vetëm 40 ditë më parë. Mos do të rritet çmimi sërish pas 40 ditësh?. Nuk është ndonjë çudi që kjo mund të ndodhë. Përderisa rritja me 25 për qind e çmimit të biletës në këto ditë të nxehta gushti nuk ka prishur indiferentizmin e ndonjë strukture shtetërore, gjithçka në këtë gjysmë shtetin tonë mund të ndodhë. Sepse edhe vetë përfaqësuesit e shoqatës e thonë zë plotë, se kjo rritje çmimi nuk ka të bëjë me vendosjen e pagesës në rrugën e Kombit. Nënteksti: kur të vendoset kjo tarifë, edhe çmimi i biletës nuk është çudi se mund të ngrihet.
Një heshtje që vret shumicën e braktisur. Një heshtje për çfarë po ndodh në Kukës nga të gjithë, bile edhe nga forcat politike që pa ndërprerje vazhdojnë llomotitjet e pakuptimta për rritje korrupsioni e vjedhje, ndonëse gjithçka e bëjnë vetë. Aq sa nuk po mundin të përfundojnë transportin nëpër bankat jashtë vendit të milionave që kanë mundur të vjedhin të patrazuar nga institucionet gjysmake të këtij gjysmë shteti grotesk. Kjo rritje e çmimit është një tregues i qartë i maskarallëkut që mbizotëron në çdo qoshe të këtij gjysmë shteti që drejtohet nga lloj-lloj maskarenjsh. Është kjo arsyeja që shqiptarët vetëm po largohen. Sepse Shqipëria siç thotë poeti Ali Asllani, drejtohet nga njerëz që dinë vetëm: “Hani, pini e rrëmbeni, mbushni xhepa, mbushni arka të pabrekë ju gjeti dreka, milioner ju gjeti darka|Hani, pini e rrëmbeni , është bota e maskarenjve| dallavere nëpër zyra, dallavere në Pazar| dallavere me të huaj, dallavere me shqiptarë…. Me të tillë drejtues, me të tillë gjysme njerëz Shqipëria është krejtësisht e mbaruar. Këtë po e ndjejmë dita ditës, ne që ende kemi mbetur këtu. E shohim, në shumë prej fshatrave krejtësisht të boshatisura sa u ka mbetur vetëm emri nëpër disa harta. Kjo është Shqipëria që ka mundur në 30 vjet të arritjeve ngrejë vetëm një gjysmë shtet që ka çuditur gjithnjë dynjanë.
