Dubrovniku, i vlerësuar gjerësisht si xhevahir i Adriatikut për dekada, sot po shndërrohet në një ‘makth’ nga adhuruesit e serialit ‘Game of Thrones.’ Në kërkim të vendeve ku u zhvilluan xhirimet, me mijëra turistë bllokojnë çdo ditë hyrjet në qytetin me mure të lashta, një vend i Trashëgimisë Botërore të UNESCO-s.

Dubrovniku është një shembull tipik i efekteve të turizmit masiv, një fenomen global në të cilin rritja e numrit të njerëzve që e vizitojnë nënkupton vende të jashtëzakonshme.

E ndërsa numri i turistëve vazhdon të rritet, autoritete lokale po kërkojnë mënyra për të mbajtur larg turmat nga ‘vrasja’ e sharmit të qytetit. Marc van Bloemene, banor i Dubrovnikut, thotë se ‘është sikur të jetosh në mes të Disneyland’, ndërsa sheh si ‘kërcënim’ prurjet masive të turistëve, të cilët sipas tij kanë krijuar një situatë kaotike.

Me sa duket ky problem po dëmton në një farë mënyrë reputacionin e Dubrovnikut. UNESCO paralajmëroi vitin e kaluar se titulli i trashëgimisë botërore të qytetit ishte në rrezik për shkak të rritjes së numrit të turistëve.

Vitin e kaluar, autoritetet vendore hartuan planin ‘Respektimi i qytetit’ që kufizonte numrin e turistëve nga anijet turistike në një maksimum prej 4 mijë në ditë, plan i cili me sa duket duhet të vijojë të zbatohet për të frenuar numrin e vizitorëve.

Sipas kreut të bordit turistik të qytetit, Romana Vllashiç, suksesi i ekipit kroat të futbollit në Kampionatin Botëror po ashtu solli prurje të reja të turistëve, krahas adhuruesve të ‘Games of Thrones’.

Ndërkohë, shtoi se mbi 800 mijë turistë e vizituan Dubrovnikun që nga fillimi i vitit, një rritje prej 6 për qind nga e njëjta periudhë e vitit të kaluar.