Deputet i LSI-së, njëkohësisht edhe pedagogu në Fakultetin e Letërsisë në Tiranë, Shezai Rrokajt, i ka bërë thirrje qeverisë që të lejë demagogjitë. Në një deklaratë për mediat, Rrokaj thotë se qeveria duhet të marrë përgjegjësitë që i takon e të mos merret me fjalë.

Deklarata e deputetit Shezai Rrokaj:
Para këtij miratimit të ligjit të ri në vitin 2015 tarifat i propozonin IAL-të dhe i miratonte qeveria, kurse me këtë ligj ajo ‘lau duart duke ua lënë në derë’ përgjegjësinë universiteteve.
Por përse më parë ajo nuk i uli tarifat?
Përse nuk shprehet sa është tavani dhe dyshemeja e tarifave sikundër ligji e kërkon?
Përse nuk i subvencionon sipas standardeve të njohura IAL-të? Kjo ndodh sepse Qeveria nuk mbështet arsimin me 5% të PBB-së, siç premtoi në vitin 2014.
Ndryshe nga vendet e OECD-së, dhe gjithë rajoni buxheti për arsimin është vetëm 3,2%.   Kurse universitetet mbështeten vetëm me 0,5% të PBB-së. Me këto fonde nuk mbulohen as 12 muaj paga.
Ndërkaq vetëm me paratë e 2 km rrugë, si ajo e unazës së re, tarifat barazohen me ato të rajonit. Kjo është arsyeja kryesore e tarifave të larta dhe pagave më të ulëta në rajon për pedagogët.
Mungojnë fondet për kërkim dhe bibliotekat on line për studentët dhe pedagogët. Që prej Amerikës e Evropës, me në krye Finlandën, investimi për arsimin shkon në 7% të PBB-ve të tyre, sepse kudo është kuptuar se investimi në kapitalin njerëzor është më dobiprurës se çdo investim tjetër.
Krejt ndryshe, qeveritë shqiptare kanë ndjekur politika demotivuese, deri në frenuese, sepse asnjëherë bota akademike nuk është parë si partner zhvillimi.
Madje pushteti politik e ka parë me një smirë e xhelozi bizantine, duke i detyruar njerëzit e dijes ose të largohen, ose të qëndrojnë, por të shkurajuar për rritjen e cilësisë në edukim.