Florida Doçi, Doktorante në Kanada, fluturoi nga Kanadaja në Tiranë vetëm për t'iu bashkuar protestës studentore.

E ftuar në Ora News, ajo tregoi se fluturimin e kreu nga Prishtina.

Doçi: Erdha për të mbështetur protestën këtu. Mu desh të fluturoja nga Prishtina sepse çmimi i biletave në Shqipëri ishte dyfishi që ishte në Prishtinë.

Ajo thotë se ligji i arsimit të lartë është një hap mbrapa sa i takon zhvillimit të arsimit në vendin tonë.

Doçi: Ligji i arsimit të lartë dhe çdo reformë arsimore është mjaft komplekse.Duhet bërë një reformë rrënjësore nuk duhet të huazojmë nga vendet e huaja.Protesta e studentëve ishte një shuplakë kundrejt arrogancës së politikanëve dhe lidervë të këtij vendi deri tani që kanë mundur të bëjnë ato që kanë bërë për shkak se nuk ka pasur zëra të fuqishëm. Shpresa është aty, frika nuk është aty. Do të vazhdojë derisa ndryshimi të vijë.

Dy javë përpjekje të Ramës për dialog me studentët kanë dështuar me sukses dhe Doçi arsyen e gjen tek arroganca e Kryeministrit.

Doçi: Ky brez ka treguar se përballë arrogancës nuk trembet.Nuk mund të detyrosh dialogun, dialogu është dypalësh. Studentët kanë bërë këto kërkesa, është radha e qeverisë ti përmbushë ato. Taksat e Universitetit dhe tarifat janë standarde kudo, ata që studiojnë më shumë apo më pak marrin ndihma të ndryshme në formën e bursave apo ndihmave sociale.