Një operacion i policisë së Tiranës i koduar “Përsëritësit”, ka vënë në pranga tre persona të akuzuar për vjedhje, njëri prej tyre i dyshuar për vjedhje në çantën e një gruaje, skenë të cilën mund ta shihni në videon më poshtë.

Efektivët e komisariatit nr.2, kanë vënë në pranga tre persona të dyshuar për ngjarje të ndryshme.

Kështu u bë arrestimi i P. K., 37 vjeç, lindur në Vlorë dhe banues në Tiranë, i dënuar më parë me 18 muaj burg për vepren penale “Vjedhja”; E. R., 34 vjeç, lindur dhe banues në Sauk, Tiranë, i dënuar më parë për falsifikim dokumentesh dhe R. M., 25 vjeç, lindur dhe banues në Sauk, Tiranë.

37-vjeçari P.K., akuzohet në rrugën “Myslym Shyri”, i ka vjedhur një gruaje, nga çanta e krahut, celularin iPhone XS Max. Në cilësinë e provës materiale u sekuestrua celulari i vjedhur nga 37-vjeçari.

Po ky person dyshohet edhe për vjedhje të tjera, të kryera në këtë formë dhe vijon puna për dokumentimin e tyre.

Ndërsa të dyshuarit E.R., dhe R.M., në bashkëpunim me njëri-tjetrin, duke përdorur çelësin e banesës së shtetases L.A., kanë vjedhur në kohë të ndryshme, gjatë muajit korrik dhe gusht të këtij viti lekë, euro, bizhuteri, celularë, një kartë bankomati në emër të shtetases L. A., me anë të së cilës kanë kryer tërheqje lekësh në bankomat nga llogaria e kësaj shtetaseje.

Të dyshuarit E.R., dhe R.M., dyshohet se kanë kryer vjedhje të një marketi, një varëse floriri, të cilën ja kanë marrë nga qafa një gruaje dhe vjedhje banesash, për të cilat vijon puna për dokumentimin e tyre.

Ndaj të ndaluarve materialet iu referuan Prokurorisë së Tiranës, për veprime të mëtejshme hetimore, për veprën penale “Vjedhja”, në ngarkim të shtetasit P.K., dhe për veprën penale “Vjedhja” e kryer në bashkëpunim për shtetasit E.R dhe R.M.