Ambasada Italiane ka përshëndetur Raportin e KE-së për rekomandimin për hapjen e negociatave mes Shqipërisë dhe BE-së.

Në deklaratën e saj Ambasada Italiane, thekson se Shqipëria ka bërë hapa përpara drejt BE-së, ndërsa shton se Italia ka qenë dhe do të mbështesë deri në fund Shqipërinë në rrugën e saj Evropiane.

“Ambasada italiane në Tiranë shpreh kënaqësinë e saj të thellë për  raportin e botuar sot nga Komisioni Evropian, i cili rekomandon hapjen e negociatave për pranimin e Shqipërisë në Bashkimin Evropian.

 Kjo është njohja e duhur e reformave të rëndësishme të zbatuara nga vendi dhe aspiratat legjitime të shtetasve shqiptarë për t'u bashkuar me Bashkimin Evropian. Ajo hap rrugën për miratimin e rekomandimit në Këshillin Europian në qershor, prandaj do të jetë e nevojshme tani dhe në të ardhmen përpjekje të mëtejshme në veprimin reformues të vendit.

Qasja e përforcuar e propozuar nga Komisioni për negociatat mbi kapitujt e sundimit të ligjit do të jetë një mjet i dobishëm për rezultatet e arritura deri tani për t'u konsoliduar më tej në të ardhmen e afërt. Italia, e cila gjithmonë ka mbështetur hapjen e negociatave me Shqipërinë, do të vazhdojë të mbështesë Tiranën në rrugën e saj drejt Bashkimit Evropian.” shkruhet në faqen e ambasadës Italiane në Tiranë.