Një shtetas shqiptar përfundoi në prangat e karabinierëve të Vernio në Itali mëngjesin e sotëm. Ai akuzohet për kultivim të lëndëve narkotike dhe vjedhje të energjisë elektrike.
Hetimi filloi disa javë më parë kur karabinierët lokalë morën informacione për rritjen e marijuanës në shkallë të gjerë.
Gjatë një kontrolli në shtëpinë e të dyshuarit, ata më pas gjetën një serë artizanale për kultivimin e marijuanës, me rreth 60 bimë që po thaheshin me lartësi dy metra.
Në vend u gjetën të gjitha materialet e nevojshme për paketimin, peshimin, ndarjen e dozave, ujitje dhe kujdesin e bimëve.
Vlerësohet se droga do t’i jepte 30 mijë euro fitime. Për më tej, përfaqësuesit e kompanisë së energjisë konstatuan lidhjen e paligjshme të energjisë, e cila përdorej për të furnizuar llambat dhe sistemet e tjera për rritjen e bimëve.
