Situata emergjente e krijuar nga frika për përhapjen e epidemisë, pritet të sjellë zbatim të masave lehtësuese për biznesin nga Ministria e Financave. Në kuadër të masave mbrojtëse nga koronavirus, Ministria e Financave mund të anulojë vendosjen e gjobave dhe kamatëvonesave për vonesat në deklarim.
Ministria e Financave zbatoi këtë masë edhe për bizneset e prekura nga tërmeti i 26 nëntorit, sidomos ato për zonën e Durrësit. Zyrat e kontabilistëve kërkojnë të shtyhen afatet e deklarimit të TVSh-së, të Tatim-Fitimit dhe të bilanceve të biznesit, pasi janë të detyruar të mbledhin dorazi dokumentacionin e kërkuar. “Për shkak të mbledhjes së dokumentacionit, kontabilistët janë të detyruar të jenë 12 orë në ditë në kontakt me qytetarë, çka sipas tyre rrit rrezikun për shëndetin”, -u shprehen përfaqësues të zyrave të kontabilistëve për Monitor.
Për shqetësimin e ngritur nga kontabilistët drejtori i Përgjithshëm i Politikave Fiskale, Niko Lera pohon se nuk do të ketë shtyrje të afateve, pasi dorëzimi i deklaratave dhe bilanceve kryhen online. Ai i këshillon bizneset që dhe pagesat t’i kryejnë online, jo fizikisht në bankë. Burimet nga tatimet deklaruan se shtyrja e afateve për pagesat e detyrimeve kërkon edhe ndryshime në legjislacion. Bizneset janë të detyruar të kryejnë më datë 14 pagesën e TVSh-së nëpërmjet bankave, ndërsa kontabilistët duhet të mbledhin dokumentacionin dorazi për plotësimin e bilanceve.
Ndërkohë që po afron dhe 31 marsi, kur duhen dorëzuar online tek tatimet bilancet e vitit 2019. Për këtë arsye muaji mars është më i ngarkuari për kontabilistët të cilët duhet të jenë në kontakt fizik me bizneset me qëllim mbledhjen e dokumentacionit të duhur për hartimin e bilancit. Drejtoria e Përgjithshme e taksave vendore në Bashkinë e Tiranës deklaroi më herët mbylljen e sporteleve për ofrimin e shërbimeve ndaj biznesit. Shërbimet për biznesin do të kryhen nëpërmjet zyrave postave dhe adresës elektronike./Monitor