TIRANË
Një situatë më e qetë dhe e stabilizuar në spitalet COVID në Tiranë. Gazetari Erjon Skëndaj raportoi nga Spitali Infektiv se situata e qetë me shifra të rëna duket dhe në urgjencat që vijnë.

“Në COVID 1 vijnë të gjitha urgjencat e Tiranës dhe Jugut të vendit. Ka rënie të ndjeshme të numrit të urgjencave, nga 60 në javën e dytë të nëntorit, aktualisht numri në 24 orë ka rënë në 20 urgjenca mjekësore. Në dallim nga nëntori, urgjencat që mbërrijnë janë në gjendje shumë të rëndë.
Nga informacionet konfirmohet se në spitalin COVID 2 janë 180 të shtruar nga 250 që është kapaciteti i shtuar. Në spitalin COVID 1 dhe COVID 3 ka një numër të barabartë shtretërish të zënë, nga 95 të shtruar. Rënie me 103 shtrime krahasuar me javën e dytë të dhjetorit. Nga data 6 deri në datën 12 ka pasur një numër shtrimesh relativisht të lartë.
Sot rreth 376 të shtruar, më shumë se 100 më pak. Rënie ka pësuar edhe mortaliteti. Në javën e dytë të dhjetorit nga data 6-12 dhjetor janë raportuar 100 fatalitete, 14 raste mesatarisht ditore. Ndërkohë tani raportohen 85 vdekje në harkun e 7 ditëve, pra 12 vdekje në ditë”, raportoi Skëndaj.

Gazetari shtoi më tej se qytetarët preferojnë të vetë kurohen në shtëpi deri në një gjendje të rënduar të shëndetit të tyre.
“Burime për Neës24, dhe deklaratat nga mjeku Ilir Allkja vërtetojnë frikën e madhe që e kemi thënë dhe më herët, faktin që qytetarët shqiptarë po qëndrojnë larg spitalit, po vetëkurohen në shtëpi dhe me oksigjen, vijnë në spital me 70-80 % të pulmonit të prekur nga COVID-19.
Në spitalet rajonale ke nga 10-15 të sëmurë, të cilët nuk vijnë në Tiranë për të mos rënduar sistemin spitalor”, deklaroi Skëndaj