Pak ditë më parë në media janë ekspozuar dokumente që vërtetojnë se një kompani e drejtuar nga nipi i deputetit socialist Sadri Abazi, ka operuar në tendera me letra të falsifikuara duke shkelur në mënyrë arbitrare ligjin dhe garën.

Kjo kompani nisi të fitonte një zinxhir tenderash të rëndësishëm, fill pasi deputeti Abazi hoqi dorë nga të drejtat mbi kompaninë e tij Usluga, për shkak të konfliktit të interesit si deputet. Dokumentet tregojnë si kjo kompani ka falsifikuar CV-të e inxhinierëve të saj dhe kontratat garantuese.

Çfarë po ndodh ditë pas publikimit të falsifikimeve?

Kontrolli i Lartë i Shtetit ka nisur verifikimet për kompaninë e Arbër Abazit, nipit të deputetit socialist. Audituesit kanë nisur të marrin informacion dhe po shqyrtojnë të gjitha materialet mediatike për të vazhduar më tutje me kontrollin nëpër institucionet e prokurimeve, dokumentet false të të cilave janë publikuar.

Ndërkohë që në veprim është edhe Prokuroria e Elbasanit, e cila ka nisur procedim penal për falsifikim.