Prokuroria e Krimeve të Rënda ka nisur hetimin pasuror ndaj Met Kananit i njohur me emrin “Baroni i drogës”,por edhe ndaj familjarëve të tij.

Njësia e inteligjencës financiare është duke gjurmuar origjinën e parave si edhe të shumë aktiviteteve të biznesit që ka Met Kanani në Shqipëri.

Sipas ligjit të quajtur antimafia, hetimi  pasuror ka nisur rreth një muaj më parë, me urdhër të prokurores Elisabeta Imeraj pas arrestimit në Turqi të Met Kananit.

Sipas ABC neës veprimi i parë që ka kryer organi i akuzës ndaj kreut të grupit kriminal të drejtuar nga Met Kanani ishte sekuestrimi i regjistrave të shit-blerjes pranë kompanisë AlbTek me seli qendrore në Fier.

Në Qendrën Kombëtare të Biznesit, kompania që ka si administrator Kananin, është hapur në vitin 2005 dhe si kapital themeltar ka 10 milionë lekë. Por komania e Met Kananit, sipas QKB-së, tregtonte radio marrëse e dhënëse, aparate ndërlidhëse. Ndërkohë që edhe pajimet e policisë dhe të ushtrisë gjendeshin në kompaninë AlbTek, si jelek anti plumb, pranga, helmeta të llojeve të ndryshme

Gjithashtu, organi i akuzës ka kërkuar informacion nga bankat e nivelit të dytë në vendin tonë, nëpërmjet Njësisë së Inteligjencës Financiare, për të parë nëse ka para depozita parash në sistemin bankar shqiptar por jo vetëm.

Edhe familjarët e Met Kananit do të kalojnë në sitën e ligjit “antimafia”, ku do të shihet edhe aktiviteti i tyre tregtar e po kështu, pasuritë e paluajtshme, të cilat sipas prokurorisë mund të kenë rrjedhur nga ndonjë aktivitet i jashtëligjshëm.

Gjatë operacionit të koduar “Preçizioni”, në pranga të policisë ranë në pranga 13 persona ne Tiranë, Elbasan, Fier, Vlorë, Lezhë, Korçë dhe Shkodër.

Edhe anëtarët e tjerë të grupit të strukturuar kriminal do t’i nënshtrohen po ashtu, ligjit “antimafia”. Përveç kanabisit, anëtarët e bandës së Met Kananit akuzohen edhe trafikim të kokainës nga vendet e Amerikës Latine përmes Ballkanit në Shqipëri më pas drejt BE-së.