Ndryshe nga kryeministri, kryebashkiaku Veliaj tregohet “më i afërt” me artistët, di të përfitojë prej tyre, në dobi të imazhit të tij. Gjithë dimrin i vuri në rresht, njëri pas tjetrit për të “mbjellë” pemë, ata ndërkombëtarët i fton e u jep nga një çelës, të tjerët gjen rastin t’u bëjë ndojë qokë. Së fundi Veliaj, në mbledhjen e radhës në Këshillin Bashkiak të Tiranës miratoi vendimin për ngritjen e Këshillit Artistiko-Kulturor të Tiranës. Në bazë të këtij vendimi, ky këshill ka karakter këshillimor dhe vepron pranë bashkisë së Tiranës për shqyrtimin, vlerësimin dhe miratimin e projekteve kulturore dhe sportive, që ato të jenë në përputhje me prioritetet e politikave kulturore të bashkisë Tiranë. Po a ka vërtet nevojë Veliaj për këshilla? A mendoni se vërtet ai do të marrë mendimin e tyre për projektet e njerëzit që do ftojë e do marrin para? Absolutisht jo. Ata janë aty për të marrë ato pak lek që u jep, dhe për të përftiuar në ndonjë rast tjetër tjetër.
Eshtë për të ardhur keq se në përbërjen e Këshillit Artistiko-Kulturor i Tiranës ka personalitete të spikatura nga fusha të ndryshme të artit, kulturës, sportit dhe të shkencës. Bien në sy mes 9 anëtarëve të këtij këshilli emra si “Artisti i Popullit” Robert Ndrenika, aktorja Yllka Mujo, trajneri i sportit të futbollit, Ylli Tomorri apo edhe piktori Helidon Haliti, të cilët do të përdoren për t’i brë fresk Velisë e për të nxjerrë nëpër ekrane për “politika të mëdha”, për projekte që nuk i prishin punë, ndërsa ato punët e përditshme, aty ku fitohen para për vete e për klientelën ka kush i jep këshilla e ka kush e ndihmon.
Se sa rëndësi ka ky këshill duket nga vlerësimi financiar që i bën Veliaj. E dini sa vlejnë këshillat e të madhit Robert Ndrenika, apo Yllka Mujos? Hiç gjë! 4500 lekë! Mjafton për të rritur pak pensionin! Sepse vendimi i Këshillit Bashkiak ishte edhe miratimi i pagesës së çdo anëtari me 4 500 (katër mijë e pesëqind) lekë për çdo mbledhje. E ata, në rastin më të mirë mund do të mblidhen 1 herë në muaj, por nuk besoj se do mblidhen 12 herë në vit!
F.Slatina
