Regjisorja dhe aktorja Eliona Thomaraj shprehet se që nga viti 1947 teatri rezistoi për disa dekada. Por për aktoren sot po harrohet se çfarë iu intereson artistëve. Në reagimin e saj që nga Italia aktorja shkruan se në vijim të dëmtimeve të trashëgimisë, këtë herë duket se i erdhi radha Teatrit Kombëtar, gjë e cila ka gjetur kundërshtim jo vetëm te artistët, por dhe më gjerë. “Tani radha i erdhi Teatrit Kombëtar.
Shfaqja e parë shqiptare u vu në maj 1945 dhe qysh nga viti 1947 ku mori edhe emrin Teatri Popullor e deri më 2018 nën emërtimin Teatri Kombëtar i rezistoi disa sistemeve dhe dhjetëra dekadave. Jemi sot në vjedhjen më të madhe dhe kastrimin e memories artistike në vend”, shprehet regjisorja Thomaraj në reagimin e saj.
Çështja e Teatrit Kombëtar ka bërë që gjatë kësaj kohe të ketë shumë reagime, duke kundërshtuar vendimet që çojnë në shembjen e teatrit. Për një pjesë të artistëve kjo gjë është e papranueshme, dhe sipas aktores nuk iu interesojnë kullat në qendër të qytetit. “Kujt i intereson kulla në qendër të qytetit?! Sigurisht as artistëve dhe as artdashësve, atëherë pse gjithë kjo bujë dhe protesta kur askush nuk kërkon diçka tjetër veç restaurimit të godinës historike, teatrit të parë të ndërtuar në Shqipëri në 1938-‘39 pas amfiteatrove, që datojnë qysh nga koha e antikitetit. Përse qeveria me prepotencë vetëvendos në kundërshti me dëshirat e taksapaguesve të shkatërroj tempullin e kulturës shqiptare!”, vijon Thomaraj. Sipas regjisores dhe aktores, teatri është zëri i të gjithëve dhe meriton të jetë në vendin ku është sot.
“Një klan antivlerash të mbledhura si hijena pas kockës vertebrale kërkojnë të thithin palcën e fundit, (theksoj të fundit pasi po të kthehemi në kujtese emocionale Tiranës po i shuhet memoria kolektive, duke tjetërsuar ose asgjësuar të gjitha godinat domethënëse për qytetarët dhe gjeneratat). Godina e teatrit na krijoi katarsis shpirtëror në jetët tona, ai mbushi zemrat dhe mendjet e qytetarëve qysh pas lufte e deri më sot. Ai teatër është zëri i të gjithëve dhe sikur vetëm për këtë ai meriton të jetë atje dhe ashtu siç është”, përfundon regjisorja dhe aktorja Eliona Thomaraj.
