Ministri i Jashtëm i Hungarisë, Peter Szijjarto ka pohuar se Bashkimi Evropian duhet të përshpejtojë zgjerimin për të përfshirë vendet nga Ballkani Perëndimor. 

Sipas planit aktual të BE-së, as vendet me përparimin më të madh drejt anëtarësimit nga Ballkani Perëndimor, Serbia dhe Maqedonia, nuk pritet të hyjnë në bllok para vitit 2025, raporton Reuters.

“Duhet të zgjerojmë BE-në sa më shpejt që të jetë e mundur”, ka thënë Szijjarto në organizatën londineze “Chatham House”, duke thënë se nuk duhet që ato vende të presin edhe shtatë vjet për të kaluar këtë proces.

“Dëshirojmë të shohim BE-në me 28, 29, 30 anëtarë. Ballkani Perëndimor është vend ku tensionet mund të shfaqen”.

Franca dhe Holanda janë duke kundërshtuar planet e BE-së për të lejuar hapjen e bisedimeve për anëtarësim me Shqipërinë dhe Maqedoninë si pasojë e brengave se vendimi mund të ushqejë edhe më shumë ndjenjën anti-emigrim në bllok, kanë thënë diplomatët e BE-së.