Gjatë ditës së sotme pritet që komisioneri për Zgjerim të Bashkimit Europian, Johannes Hahn të vizitojë Kosovën.

Hahn vjen vetëm pak ditë përpara se Parlamenti Europian të marrë vendimin mbi liberalizimin e vizave për qytetarët Kosovarë për të cilin janë shtuar zërat se do të jetë negativ edhe këtë vit.

Në shenjë pakënaqësie, një grup protestuesish të udhëhequr nga ish-asamblisti i Komunës së Drenasit, Xhavit Drenori, kanë shpalosur një banderolë të madhe përpara zyrave të qeverisë në të cilën shkruhet: “Mr. Hahn, në Kosovë aplikohet reciprociteti, të nevojitet vizë për të hyrë”.

Hahn do të vizitojë krerët e shtetit të Kosovës dhe misioni i tij është t’i bindë ata për heqjen e tarifës 100% ndaj mallrave serbe të vendosur nga qeveria e Haradinajt përpara pak ditësh.

Ndërkohë që BE bën thirrje për heqjen e takksës 100%, nga ana tjetër kjo vjen në kohën kur qytetarët presin dritën jeshile për liberalizimin e vizave, pasi Kosova është i vetmi shtet, qytetarët e të cilit nuk lëvizin të lirë nëpër Europë.