Ministri i Jashtëm i Serbisë, Ivica Daçiq thotë se Serbia nuk po bën fushatë kundër tërheqjes së njohjeve të Kosovës por dëshiron ta detyrojë Prishtinën të bëjë kompromis.

“Ata nuk do të bëjnë kompromise, thonë se na kanë njohur 116 vende. Tani, le të shohim se sa e kanë njohur atë? Ne po i detyrojmë ata të bëjnë ndonjë kompromis”, tha Daçiq për TV Happy.

Mediat në Serbi raportuan të premten se shteti i radhës që ka tërhequr njohjen e Kosovës është Republika Nauru, kësisoj duke u bërë vendi i 17-të.

Ministria e Punëve të Jashtme në Kosovë pas lajmit kanë thënë se Kosova nuk bën komente për deklarata dhe dokumente që shpallen nga Beogradi dhe që bëhen pasi shteti serb paguan ryshfet për to.