Nga Kastriot Dervishi
Me kërkesë të deputetëve të Kuvendit të Shqipërisë, ishte rënë dakord që familja mbretërore të kthehej në atdhe më 28.6.2002, ora 12.00. Për të realizuar këtë, u zhvillua një korrespondencë midis Ministrisë së Rendit Publik, Ministrisë së Punëve të Jashtme dhe Ministrisë së Drejtësisë. Në fund, familja erdhi nëpërmjet disa lejekalimeve të shkruara të gjitha me gabime. Në të gjitha lejekalimet shkruhet “e përgjuithshme” dhe “qerndrore” Drejtorinë e Përgjithshme të Policisë dhe një institucion varësie të saj (nuk po përmend tekstin e lejekalimeve). D.m.th. kjo çështje aq e debatuar ndër vite për dokumentet e familjes, përfundoi me disa lejekalimi qesharake. Në praktikën e rastit ndodhen edhe dokumente që kanë të bëjnë me diskutime të kota të Drejtorisë së Përgjithshme të Policisë, për çështje statusi, shtetësie, etj. Ditën e ardhjes së familje, së bashku me të ishin edhe 4 shtetas nga Afrika e Jugut dhe një nga Pakistani. Le të kujtojmë disa procedura të ndjekura në atë kohë.
-Me shkresën nr.3617, datë 10.6.2002, ministrja e Punëve të Jashtme, Arta Dade i shkruante Këshillit të Ministrave mbi statusin e familjes mbretërore. Sipas saj ishin interesuar autoritetet e Afrikës së Jugut nëpërmjet ambasadës së Shqipërisë në Romë. Po ashtu konsulli i nderit të Shqipërisë në Johanesburg, Nikola Rose. Ministrja bën të ditur se konsulli nuk duhet të vepronte pa dijeninë e MPJ-së, si dhe familja mbretërore duhet të vinte e pajisur me pasaportë shqiptare. Për statusin juridik të Leka Zogut, MPJ iu drejtua edhe Ministrisë së Drejtësisë.
-Me shkresën nr.3865, datë 20.6.2002, ministrja e Punëve të Jashtme, Arta Dade, njofton Ministrinë e Rendit Publik se dy ditë më parë, me anë të përfaqësuesit Fluturak Gërmenji, familja mbretërore kishte kërkuar pajisje me leje kalimi. Gërmenji nënshkruante një dokument me vulën “Rezidenca e familjes mbretërore. Administrata”. Në kërkesë, së bashku me fotot ishin emrat e Mbretëreshës Geraldinë, Leka, Suzana dhe Leka Zogu. Në kërkesë për asnjë person nuk përmendej titulli mbretëror.
