Në ditëlindjen e Vilson Blloshmit (1948-1977), kujtojmë dy akuzat e ngritura ndaj tij. Raportimet e para për të nga Sigurimi janë nga viti 1966, ndërsa ndjekja aktive është nga viti 1970. U arrestua më 5.8.1976. Vendimi për arrestimin e tij u mor një ditë më parë në Tiranë, nga hetuesi Isa Halili, me miratimin e zëvendësprokurorit të përgjithshëm Sotir Samara. Pasi cilësohej si “shtresë e pasur kulak”, akuzohej në bazë të nenit 73/1 të Kodit Penal për agjitacion e propagandë, me të cilën mund të dënoheshe maksimumi 10 vjet heqje lirie. Në vendim thuhet se Vilsoni “në kohë e vende të ndryshme, si dhe me persona të ndryshëm, ka agjituar e propaganduar për minimin, dobësimin dhe rrëzimin e pushtetit popullor, duke konsumuar plotësisht elementët e figurës së krimit, parashikuar nga neni 73/1 i Kodit Penal”.

Për të maksimalizuar dënimin, pas udhëzimeve të Komitetit të PPSH-së Librazhd, disa muaj më pas u vendos që të shtohej neni 72 i Kodit Penal, sabotimi, i cili ishte mbi 10 vjet heqje lirie, ose me vdekje dhe kurdoherë me konfiskim te pasurisë. Kjo akuzë e paraqitur më 9.5.1977 nga hetuesi Selim Caka, nuk u pranua dhe nënshkrua nga Vilson Blloshmi. Akuza nuk ka miratimin e prokurorit.