Megjithëse ishte 75 vjeç, komunistët nuk i kursyen plumbat ndaj Sheh Qerim Salihut. Për të mos u ndaluar deri këtu, i vranë edhe djalin Sali Qerim Shehu. Të gjithë u akuzuan në bazë të neneve 2, 12, 14, 15, 18 të ligjit nr.41, datë 14.1.1945 si “kriminelë lufte dhe armiq të popullit”. Gjykimi i tyre nisi dhe përfundoi më 15.6.1945 në kinema “Majestik” të qytetit. “Pothuajse të gjithë” akuzoheshin si pjesëtarë të Ballit Kombëtar. Këshilli Gjyqësor i Qarkut Korçë i Krahinës së 2-të të Korpusit të 2-të, i drejtuar nga kapiten i parë Koço Prifti, me pjesëmarrjen e prokurorit kapiten Nevzat Haznedari, me vendimin pa datë të kësaj dite, dha dënimet me vdekje dhe me konfiskim të pasurisë:

1-Maliq Mehmet Dushari (Salianji), nga Dushari, i vitlindjes 1885

2-Hasan Tahir Dushari, nga Dushari, i vitlindjes 1876

3-Ajdin Jonuz Kulla, nga Zëmblaku, i vitlindjes 1911

4-Gani Hymet Kulla, (Zëmblaku), i vitlindjes 1877

5-Niko Dhimitër Ceno nga Manastiri, i vitlindjes 1902

6-Zyhdi Veli Tapija nga Vlora, i vitlindjes 1885

7-Sheh Qerim Salihu nga Bilishti, i vitlindjes 1870

8-Sali Qerim Shehu i vitlindjes 1895

U la në fuqi me vendimin nr.119, datë 18.6.1945 të Gjykatës së Lartë Ushtarake. Pesë të parët u ekzekutuan në Korçë, ndërsa tre të fundit në Bilisht. Më 26.6.1945 Enver Hoxha miratoi dënimet me vdekje. Vendimet u ekzekutuan më 29.6.1945.