Nga Gazmend Bakiu

Më 29 mars 1923, nga Shkolla Teknike amerikane u vu në punë Centrali i parë elektrik, i cili furnizoi me energji elektrike zyrat administrative dhe tri rrugë të Tiranës. Në vitin 1927, ishin të instaluara 500 llampa në rrugë dhe në shtëpi private. Pikërisht në këtë vit konçensioni për ndriçimin elektrik iu dha Shoqërisë Industriale Tirana Anonime (S.I.T.A.).

Kontrata konçesionare, (për kohëzgjatje 20 vjet), u nënshkrua më 27 shtator 1927, ndërmjet zëvendës Komiserit të qeverisë pranë Bashkisë së Tiranës Izet Dibra, dhe Drejtorit të përgjithshëm të S.I.T.A.-s Aleksandër Hobdari. Për transparencë, kontrata u botua për publikun (shikoni foton). Në kontratë ishin parashikuar të gjitha beneficet, detyrimet e palëve, dhe mënyra e zgjidhjes së mosmarrëveshjeve. Sipas nenit XIX, (dhe shtojcës përkatëse të tij) nëse për faj të S.I.T.A.-s, energjia elektrike do të ndërpritej më shumë se 20 minuta, shoqëria në fjalë do t’i paguante Bashkisë 20 franga ari dëmshpërblim për çdo orë mungesë energjie. Nëse ndërprerja e energjisë do të vazhdonte më shumë se një natë, atëhere S.I.T.A. do t’i paguante Bashkisë dëmshpërblimin prej 500 franga ari për çdo natë.

Centrali elektrik ishte i vendosur në të dalë të qytetit, në rrugën e Durrësit. Motorët “Diezel”, gjeneratorët dhe pajisjet e tjera u sollën nga Austria. Më 4 nëntor 1928 u zhvillua ceremonia e fillimit të distribuimit të energjisë nga S.I.T.A., ku folën Aleksandër Hobdari dhe kryeministri Kostaq Kotta. Ky i fundit preu shiritin e inaugurimit, vuri në lëvizje makineritë dhe dritat u ndezën.

Në vitin 1937 u arrit që kryeqyteti të kishte 44 km rrugë të ndriçuara, me llampa me fuqi nga 40-500 wat.