Motra më e vogël e mbretëreshës, Maxima, Inés Zorreguieta vdiq dje në mbrëmje në Buenos Aires, informacionet e parë raportojnë për vetëvrasje, bëri të ditur familja mbretërore holandeze. Trupi i pajetë u gjet në një apartament në lagjen “Almagro”, në perëndim të kryeqytetit rreth orës 03:00 GMT, raportoi e përditshmja argjentinase “Clarin”.

Këngëtare dhe kitariste, e lindur në vitin 1984, ajo vuante nga depresioni, sipas gazetës. Ines u kurua në vitin 2012 në një klinikë psikiatrike pasi vuante nga anoreksia dhe paranoija, sqaroi radio-televizioni publik holandez NOS.

Mbretëresha Maxima kishte marrëdhënie shumë të ngushta me të motrën, trembëdhjetë vjet më e vogël se ajo, sipas medias holandeze. Ines ishte shoqëruese nderi në martesën e Maximas me princin Willem-Alexander, si dhe kumbara e vajzës së tretë të çiftit mbretëror, princeshë Arianës.

Përveç Ines, Maxima ka gjithashtu edhe dy vëllezër, Martin dhe Juan, si dhe tre gjysmë motra nga martesa e parë e babait të saj. Pas vdekjes së të motrës, mbretëresha e Holandës anuloi daljet publike për ditët në vijim, njoftoi agjencia holandeze e lajmeve ANP dhe web-i Nu.nl.