Presidenti Donald Trump thotë se është shumë i shqetësuar për fatin e Jamal Khashoggit, gazetarit saudit, i cili u zhduk gjatë javës së shkuar kur po vizitonte konsullatën saudite në Stamboll. Por presidenti tha se ngurron të pezullojë një marrëveshje armësh prej 110 miliardë dollarësh me Arabinë Saudite.

Pas më shumë se një jave, ende nuk ka asnjë shenjë të Jamal Khashoggit, gazetar dhe komentator saudit për Washington Post-in, i cili jeton në mërgim vetimponuar në Shtetet e Bashkuara.

Presidenti Donald Trump u pyet se a duhet që SHBA ta kishin paralajmëruar Khashoggin nëse kishin të dhëna zbulimi se jeta e tij ishte në rrezik:

"Kjo nuk ndodhi në vendin tonë por në Turqi dhe nuk bëhet fjalë për një shtetas amerikan, mesa kuptoj. Gjithsesi një gjë e tillë nuk duhet të ndodhë. Bëhet fjalë për një gazetar që shkruan për Washington Post-in dhe diçka e tillë nuk duhet të lejohet të ndodhë. Ne synojmë t’i shkojmë kësaj deri në fund,” tha Presidenti.

Zoti Trump tha për kanalin Fox News se SHBA kanë hetues në Turqi dhe po punojnë me Turqinë e me Arabinë Saudite.

Zëdhënësja e Departamentit të Shtetit Heather Nauert thotë se Uashingtoni kërkon fakte nga sauditët:

"Kemi komunikuar me ambasadorin saudit në Shtetet e Bashkuara dhe me sa kuptoj ai po kthehet në Arabinë Saudite. I kemi thënë se presim informacion pas kthimit të tij në Shtetet e Bashkuara".

Vizita e parë e Presidentit Trump në një vend të huaj ishte në Arabinë Saudite vitin e kaluar, për të kultivuar një marrëdhënie të ngushtë me sundimtarët sauditë, duke përfshirë princin e kurorës Mohammed bin Salman. Presidenti amerikan ngurron të anulojë shitjen e armëve Arabisë Saudite, nëse pretendimet se sauditët kanë vrarë Khashoggin janë të vërteta:

"Ata (sauditët) po shpenzojnë 110 miliardë dollarë për blerjen e pajisjeve ushtarake amerikane. Nëse nuk ua shesim, ata do të thonë: ‘shumë faleminderit, por do t’i blejmë nga Rusia ose nga Kina.' Kjo nuk na ndihmon përsa i përket vendeve të punës. Por ka gjëra të tjera që ne mund të bëjmë".

Një grup senatorësh nga të dyja partitë i dërgoi një letër Presidentit Trump, duke bërë që të nisë një hetim mbi fatin e Khashgoggit, sipas Aktit Global Magnitsky për Liritë dhe të Drejtat e Njeriut.

Analistët thonë se Kongresi ka gjasa të kërkojë sanksione dhe mund të përpiqet të bllokojë shitjet e armëve amerikane për sauditët.

"Kongresi, natyrisht, do të ngulë këmbë, veçanërisht përpara zgjedhjeve të nëntorit, por nuk besoj që Arabisë Saudite t’i vihen sanksione”, thotë analisti i Fondacionit Seta në Uashington, Kadir Ustun.

Analisti përmend marrëdhënien e ngushtë të zotit Trump me sauditët dhe komentet e tij rreth asaj se si Presidenti amerikan e sheh marrëveshjen për armët, duke thënë se nuk pret sanksione me rëndësi.

Ndërkaq, gazeta Washington Post njofton se sipas zyrtarëve amerikanë dhe turq, qeveria turke u ka thënë zyrtarëve të Shteteve të Bashkuara se posedon regjistrime audio dhe video që vërtetojnë se Khashoggi, është vrarë brenda konsullatës saudite në Stamboll.

Sipas gazetës, regjistrimet tregojnë se një ekip sigurie i Arabisë Saudite e mbajti Khashoggin në konsullatë, pasi ai hyri aty më 2 tetor për të marrë një dokument zyrtar martese, pastaj e vrau dhe ia coptoi trupin.