Për kancelaren Merkel po shkruhet e flitet aktualisht më mirë se kurrë më parë. Jo vetëm në Gjermani, por edhe në mjaft vende të botës, madje jashtë vendit edhe më shumë.
“Mediat në Izrael”, thotë Amichai Stein për Deutsche Wellen, “e konsiderojnë atë si një nga personalitet udhëheqëse më të forta në të gjithë botën”. Stein është korrespodent diplomatik për KAN, televizionin publik të Izraelit. Sipas Stein në Izrael Merkel vlerësohet si një figurë udhëheqëse “e cila e kupton situatën dhe di t’ua shpjegojë atë qartë njerëzve”.
Vlerësimi nga Izraeli përkon me komentet e mediave, vlerësimet politike apo komentet në mediat sociale në të gjithë botën. Gazeta “New Zealand Herald” shkruante se Gjermania dhe Merkel kanë dalë “fituese” gjatë krizës dhe janë “model ” me strategjinë e tyre në luftën kundër pandemisë.
“Një udhëheqëse e vërtetë”
Në një koment për “Clarin”, gazeta e përditshme më e lexuar në Argjentinë komentatori Ricardo Roa shkruan se ” 65 vjeçarja, doktore në fizikë, bijë e një pastori luteran dhe një mësueseje të latinishtes”, e cila u rrit në Gjermaninë Lindore, është një grua që, edhe pas 15 vjetësh në krye të një fuqie madhore, sillet “si një njeri normal” edhe tani gjatë krizës së koronës. Merkel shkruan ai është ndër politikanët e pakët në mbarë botën që “drejton, komunikon me saktësi shkencore, transmeton qetësi dhe pas çarmatos histeritë”. Roa thotë se kancelarja Merkel udhëheq me “me kthejlltësi dhe vendosmëri dhe përpiqet që t’i zgjidhë problemet dhe jo të shfrytëzojë problemet për të nxjerrë përfitime politike”.
Merkeli si pikturë murale në Binish, Siri
Lëvdatat dhe vlerësimet në mediat ndërkombëtare tregojnë se mënyra se si udhëheq vendin kancelarja Merkel është bërë një gjë e rrallë në botë. “Një udhëheqëse e vërtetë”, përfundoi komentatori nga Argjentina, duke kritikuar indirekt politikanët në Amerikën Latine. Kjo vlen edhe për SHBA dhe Britaninë e Madhe. Kushdo që lexon shkrimet e tanishme të “The Atlantic”, “Forbes” ose “New York Times”, has një lëvdata për Merkelin, në të cilat kritikohet indirekt presidenti Trump.
“Bravo i koft valla!”
Edhe mjaft kolegë nga Deutsche Welle që ndjekin komentet në rrjetet sociale në shumë gjuhë konstatojnë këto ditë se njerëz shprehin respekt për kancelaren Merkel. Kështu ndjekësja e DW shqip Aida Rramanaj shkruan “bravo i koft valla 1 shtet e man e vetmja femer qe din me udheq shtetin e vet e nuk e vjedh, te lumt je femer me vler per mendimin tim.” Kurse Claudio Hulio Mia shkruan “Kjo është grua e hekurt.” Philbert Jonathan Kyenshambi nga Tanzania shkruan në twitter se kancelarja gjermane “kapi momentin në luftën kundër Coronës”, kurse Alistide Elias Byamungu nga Afrika e Jugut shkruan: “Urime, kancelarja Angela Merkel!”
