Kompania farmaceutike Moderna bëri të ditur se do të aplikojë sot në Administratën e Ushqimit dhe Medikamenteve (FDA) dhe në Europë tek EMA për të marrë autorizimin për përdorimin e vaksinës së saj kundër koronavirusit.

Injeksionet e para në SHBA mund të bëhen që më 21 dhjetor nëse procesi shkon mirë dhe merret miratimi, tha në një intervistë Stéphane Bancel, shefi ekzekutiv i kompanisë.

Aplikimi i Modernas bazohet në të dhënat që ka paraqitur, të cilat tregojnë se vaksina e saj është 94.1% efektive, dhe se studimi i kryer me 30 mijë njerëz përmbush kriteret shkencorë të nevojshëm për të përcaktuar nëse vaksina funksionon.

Rezultatet e studimit komplet janë në linjë me të dhënat e paraqitura më 16 nëntor që pretendonin se vaksina ishte 94.5% efektive.

Të dhënat e reja treguan edhe se vaksina ishte 100% efektive për parandalimin e sëmurjes së rëndë nga coronavirusi.

Bancel tha se kompania ishte në rrugën e duhur për prodhimin e 20 milion dozave deri në fund të dhjetorit, 500 milionë deri në 1 miliard më 2021. Çdo person ka nevojë për dy doza, të injektuara në distancë një muaj, kështu që 20 milion dozat e para do të mjaftojnë për 10 milionë njerëz.