Presidenti i zgjedhur Donald Trump ka filluar të zgjedhë njerëzit që dëshiron për të zbatuar politikat e tij "Amerika e Para" në lidhje me kufijtë, tregtinë, ekonominë e të tjera.

Disa nga këto figura pritet të mbajnë një qëndrim të ashpër ndaj Kinës, përfshirë senatorin Marco Rubio, i cili pritet të jetë sekretar i shtetit dhe kongresistin Mike Waltz si këshilltar i sigurisë kombëtare. 

Shumë prej tyre aktualisht shërbejnë në Dhomën e Përfaqësuesve, gjë që mund të ndikojë në shumicën e ngushtë që pritet të ketë Trump-i në ditët e para të administratës së tij.

Ja një vështrim mbi disa nga njerëzit që Trump po zgjedh:

Marco Rubio, Sekretar i Shtetit

Ish-rivali i Trump-it dhe më vonë mbështetës i tij në senat. Rubio është kritik i Kinës, e cila e ka sanksionuar atë. Ai ka mbrojtur qëndrimin e Trump-it për të përfunduar shpejt luftën e Rusisë në Ukrainë, duke sugjeruar bisedime që mund të përfshijnë dorëzimin e territoreve të okupuara.

Mike Waltz, Këshilltar i Sigurisë Kombëtare

Ish-Beretë e Gjelbër dhe veteran i Afganistanit, Waltz është kritik i politikave të Pentagonit dhe e konsideron Kinën kërcënimin më të madh për SHBA-në.

Kristi Noem, Sekretare e Sigurisë Kombëtare

Guvernatorja e Dakotës së Jugut, Noem, është kritikuar për deklaratën në librin e saj se kishte vrarë qenin e saj 14-muajsh. Në rolin e saj të ri, ajo pritet të zbatojë politikat e Trump-it mbi emigracionin, përfshirë dëbimet masive të emigrantëve pa dokumente.

Elise Stefanik, Ambasadore e SHBA-së në OKB

Stefanik është përshkruar nga Trump si një "luftëtare e fortë dhe inteligjente për Amerika e Para." Ajo ishte ndër republikanët që kundërshtuan certifikimin e fitores së Joe Biden-it në vitin 2020 dhe e mbështeti Trump-in për kandidaturën e tij të tretë për president.

Tom Homan, "Cari i kufirit"

Ai u bë figura publike e politikave të ashpra mbi emigracionin gjatë mandatit të parë të Trump-it, ku politikat e "tolerancës zero" çuan në ndarjen e fëmijëve nga familjet, gjë që shkaktoi reagime të forta.

Susie Wiles, Shefe Kabineti e Shtëpisë së Bardhë

Operativja politike republikane solli stabilitet, rend dhe disiplinë financiare në një fushatë zgjedhore, versionet e së cilës në vitet 2016 dhe 2020 ishin shumë më të paqëndrueshme. Ajo pritet të bëhet gruaja e parë e zgjedhur për të shërbyer si shefe e kabinetit dhe ka gjasa të ndihmojë në përcaktimin e strategjisë për 100 ditët e para të Trump-it në detyrë.