Autori i sulmit me fugon nga i cili humbën jetën 10 persona dhe u plagosën 15 të tjerë është identifikuar nga autoritetet kanadeze.

Agresori është 25-vjeçari Alek Minassian, i cili kishte marrë një fugon me qira dhe e përdori për të goditur kalimtarë të shumtë, derisa makina u ndal.

Në pamjet filmike dëgjohet polici që thërret: “Ulu në Tokë ose do të qëllohesh”, teksa i riu vazhdonte të qarkullonte.

Minassian u arrestua pak minuta pas sulmit të përgjakshëm, pas një përballje të tensionuar me policinë. Videot e publikuara në rrjet shfaqin të dyshuarin që shtiret sikur ka një armë, duke nxitur agjentin që të hapë zjarr. Por, ky i fundit u tregua mjaft gjakftohtë dhe mundi që të arrestojë të dyshuarin pa përdorur armë, diçka për të cilën ka marrë mjaft përgëzime.

Hetuesit e Policisë së Torontos thonë se sulmi është bërë me dashje, por nuk janë ende të qarta motivet. Ndërkohë analistët thonë se fakti që i dyshuari nuk njihej nga autoritetet, e bën edhe më të ndërlikuar rastin.

Kryeministri kanadez Justin Trudeau tha se sulmi tragjik dhe i pakuptimtë i kishte shkaktuar trishtim të madh, ndërsa shtoi se qeveria është pranë viktimave dhe familjeve të tyre.