Presidenti i Republikës, Ilir Meta thotë se hapi i parë i asaj që ai e quan “grusht shteti” është rrëmbimi i Partisë Socialiste nga Rilindja dhe vrasja e demokracisë në atë parti.

Gjatë një interviste për Ilir Babaramon në “Report Tv”, Meta foli edhe për porosinë nga UDB-ja serbe për shkarkimin e tij. 

Gazetari: Ju thoni që Partia Socialiste po tenton të kapë…

Presidenti Meta: Rilindja, kam respekt për Partinë Socialiste. Sepse në vitin 1998, Kushtetutën e ka bërë Partia Socialiste, dhe në fakt kam bërë një gabim sot, se hapi i parë i grushtit të shtetit është uzurpimi i Partisë Socialiste dhe vrasja e demokracisë në atë parti dhe e ndjenjës së përgjegjësisë para shtetit, para kombit dhe shantazhimi i gjithë atyre njerëzve, shumë prej të cilëve janë njerëz të nderuar, të cilët janë detyruar dhe pse e dinë që shkelin Kushtetutën në mënyrë të vazhdueshme. Siç është edhe rasti i dividendit me fuqi prapavepruese për uljen e tatimit, por nuk kanë çfarë bëjnë, sepse janë të shantazhueshëm, sepse janë në presion të madh të shantazhit.

Gazetari: Ju në hapin e shtatë thoni, që synohet shkarkimi juaj me porosi të UDB-së. Përse kjo? UDB-ja kaq e fuqishme të jetë në Shqipëri sa të shkarkojë Kreun e Shtetit?

 Presidenti Meta: Unë mendoj që përderisa ajo edhe për shumë eksponentë edhe mediatikë siguron hapësira pa fund televizive, të cilët i dalin në mbrojtje gjithë këtij grushti të shtetit ndodhur prej kaq vitesh, të cilët sulmojnë në mënyrë më rrugaçërore Presidentin e Republikës për të vetmen arsye, sepse ka mbajtur ato qëndrime që i takon të mbajë sipas Kushtetutës, edhe për shtetin e Kosovës edhe për çështjen kombëtare. Të cilat, kuptohen janë bërë një pengesë për avancimin e atyre skenareve ogurzi që defaktorizojnë Kosovën dhe njëkohësisht defaktorizojnë shqiptarët në këtë rajon. Për llogari të kujt shkon kjo zoti Babaramo?

Gazetari: Ngelet ta gjykojnë njerëzit!

Presidenti Meta: Po, patjetër, njerëzit i kanë sytë hapur dhe do t’i kenë edhe më shumë nga faktet e reja në ditët e ardhshme.

Gazetari: Çfarë faktesh prisni të dalin?

Presidenti Meta: Tani ju e dini që vazhdimisht ne jemi vigjilentë, jemi të habitur nga kjo gjë që ka ndodhur. Jemi të habitur nga guximi i tepruar dhe i marrë që tregon pengmarrjen e këtij grupi. Sepse ky grup vepron në kushtet e pengmarrjes, është rekrutuar diku tjetër, sepse veprimet që ata po bëjnë…

Gazetari: E lidhni këtë me projektin e ndarjes së Kosovës?

Presidenti Meta: Unë këtë e lidh me shumë projekte, që në fund të ditës kanë të bëjnë me instalimin e grushtit të shtetit si një regjim arbitrar në funksion të organizatave ndërkombëtare të huaja…

 Gazetari: Si mund të bëjë qeveria një grusht shteti zoti President?

Presidenti Meta: ...Dhe të shpopullimit të Shqipërisë. Grushti i shtetit është i disa formave dhe ajo që ka bërë qeveria – shikoni të gjitha hapat – është pikërisht që përmes uzurpimit të kompetencave kushtetuese të funksioneve të tjera, përmes asgjësimit të balancës së pushteteve dhe ndarjes së pushteteve në vend ka arritur të kontrollojë të gjitha institucionet që do të thotë se një pakicë kontrollon të gjithë jetën institucionale dhe ekonomike të një vendi.

Dhe e vendos këtë në shërbim të tjetërkujt, jo të popullit të vet.