Një ditë pasi Kuvendi miratoi vetëm me votat e maxhorancës projekt-vendimin që i hap rrugë shembjes së Teatrit Kombëtar, ish-ministri i drejtësisë, Ylli Manjani, ka reaguar ashpër. Në një postim në profilin e tij “Facebook", Manjani e cilëson si antidemokratik dhe antikushtetues hartimin e një ligji të posaçëm për prishjen e Teatrit Kombëtar. Një ligj që nuk bazohet as në Kushtetutë dhe as në asnjë standart Europian, shkruan Manjani. 

Më tej ish-ministri i Drejtësisë thekson se Rama e propozoi ligjin duke u bazuar në modelin e ligjit të Erdoganit. Erdogani hoqi qafe “Gülenistët”, Edvini do heqë qafe “Esadistët”, nënvizon Manjani.

Postimi i plotë:

“Esadistët” si “Gülenistët”...
———————
E përsëris:
Ligji për prishje-ndreqjen e Teatrit Kombëtar është anti-demokratik. Nuk bazohet as në Kushtetutë e as në asnjë standart Europian.

Ka ligje në fuqi që janë të majftueshme për ta trajtuar këtë çështjen e Teatrit. Në daç ta prishin në daç ta ndreqin, ka ligje plot!

Por hartimi i një ligji të posaçëm me emra konkretë dhe vende konkrete është shkelje e rëndë Kushtetuese dhe precedent tepër i rrezikshëm!

Është model që e përdorin diktatorët e kohës së sotme, për të nxjerrë jashtë funksioni Kushtetutën dhe procesin e rregullt ligjor.

Është model që zbaton urdhërin e të fortit në pushtet!

Ky ligj si model u mor nga Erdogani. Ai shkroi në ligj emrat e gjykatëve që i damkosi si “Gülenistë”, dhe i hoqi “ligji”... pra as proçes i rregullt ligjor e as gjë!

E njëjta gjë është edhe ky ligj që propozon Rama. Madje edhe me procedura të përshejtuara (shkelje tjetër Kushtetuese). Se ç’urgjencë ka, vetëm Ai e di!

Nëse ky ligj kalon dhe zbatohet, nuk do çuditesha kur të vijë ligji tjetër për dënimin e “Esadistëve”!

Erdogani hoqi qafe “Gülenistët”, Edvini do heqë qafe “Esadistët”!

Të gjithë ata që presin reagime apo zgjidhje nga Europa apo SHBA, e kanë kot!

Askujt nuk i intereson kjo gjë! Ndaj duhet mbledhur mendja, në ka kush për të reagur duhet ta bëjë! Përndryshe ta gëzojmë Erdoganin edhe ne!

Demokracia, Keshilli i Europës, NATO, BE e SHBA janë larg...

Janë thjesht në letër...