Kryeministri Edi Rama duket se është i vendosur për shembjen e Teatrit Kombëtar, pavarësisht reagimit të fortë të komunitetit të artistëve, qytetarëve dhe të opozitës.

Këtë vendim të Ramës e vërteton edhe ceremonia e inagurimit të Turbinës, qendrës së artit. Kryeministri Rama u kujdes që të ishte vetë i pranishëm në ceremoninë inaguruese.

Ai iu kthye kritikëve lidhur me këtë godinë si dhe atë të Teatrit Kombëtar se qeveria ka bërë disa gjëra.

“Ishte një kohë jo shumë e largët, fare e afërt, vetëm 4 vjet më parë, kur mbi truallin shtetëror kishte rënë perdja e braktisjes. Pas saj zhdukeshin koka, piktura, e objekte të veçanta dhe zgjeroheshin faqet e mykut. Teksa qeveritë iknin dhe vinin duke i anashkaluar përherë, sallat i ngjanin varrezave. Ne s’kemi bërë çudi, por ca gjera i kemi bërë. Duan, s’duan ata që dinë çfarë nuk duan dhe s’dinë çfarë thonë”, tha Rama, duke u munduar që të justifikojë në këtë formë ligjin që i hap rrugën ndërtimin mbi truall shtetëror të 6 kullave private.