Kryetari i Partisë Demokratike, Lulzim Basha, nëpërmjet dy postimeve radhazi në twitter ka reaguar në lidhje me situatën e krijuar në Arsimin e Lartë në vend, që lidhet edhe me revoltën e studentëve.
Basha shprehet se ligji i Arsimit të Lartë duhet të shfuqizohet menjëherë. Sipas tij paratë që jepen për koncesionet plaçkitëse duhet të jepen për arsimin.
“Ndryshimi në arsimin e lartë fillon me shfuqizimin e ligjit të Arsimit të Lartë dhe dyfishimin e buxhetit të arsimit. Të hiqen paratë e qytetarëve nga koncesionet plaçkitëse të check-up-it, të incineratorëve me pronarë të fshehur, të rrugëve me kosto 10 fish sa në SHBA.
Paratë e projekteve fasadë që pasurojnë Edi Ramën dhe klientët e tij të investohen në arsim. Vetëm 30 milionë euro që Edi Rama tenton të vjedhë me kompanitë guackë mjaftojnë për të ndërtuar një kampus modern për Universitetin e Tiranës, të cilin e studentët e kërkojnë prej vitesh”, shkruan Basha.
