Fillimisht i urojmë shërim të plotë nënoficeres së policisë, Ina Nuka, historia e së cilës nuk ka lidhje me mjeshtrin e mashtrimit mediatik, kryeministrin e vendit, Edi Rama. Qyshkurse ndodhi historia e plagosjes së Nukës bëmë parashikimin se ajo ishte plagosur, porse nuk kishte humbur asnjë gisht. Ky përfundim nuk ishte aspak i vështirë sepse të dhënat për ngjarjen nuk erdhën as nga vendngjarja, as nga policia e as nga spitali, por nga vetë shpërndarësi i lajmeve, regjisori i mirënjohur Edi Rama. Nuk e kishim fare të vështirë që aktin e turpshëm të këtij lajmdhënësi ta parashikonim si lajm të rremë, sepse qeveria është portali më i madh i gënjeshtrave në Shqipëri, ajo nuk kryen asnjë detyrë funksionale, përveçse gjiton e paraqet një realitet të ndryshëm nga ai që ekziston. Kur nënoficerja u plagos, u tha që humbi 4 gishta, më pas u bënë 3, shkuan 2 e në fund përfundoi në një gisht të humbur. Rama e keqpërdori vajzën e re në polici dy herë. Herën e parë në kuadër të strategjisë për të vënë femra në vijën e parë të protestave, kjo vetëm për një fiksim prej të marri që vetëm ai mund ta dijë nga i vjen dhe herën e dytë në manipulimin e opinionit publik për veprimet e “shpellarëve”. Në prag të kthimit në atdhe, Rama porositi portalet që kontrollon se gjoja ishte zbuluar një teknikë e re e “ngjitjes së gishtave”, prej së cilës, doktori turk, i kishte “ngjitur” gishtin nënoficeres. Mirëpo në Tiranë patën thënë se gishti ishte prerë. Sipas kësaj teknike, i bie që me gisht me vete, doktori turk të ketë bërë mrekullinë, krejt e panjohur sot në botë. Sigurisht nuk ekzistonte asnjë teknikë e re sepse gishti i nënoficerës ishte aty ku duhej të ishte, në vendin e vet. Ai që kishte gënjyer ishte vetëm kryeministri i vendit, e pas tij edhe boria e bashkisë, i cili e dramatizoi edhe në forma të turpshme këtë histori. Edhe kjo histori pra ishte si ajo e Griseldës, gënjeshtër.  Në fund fare, pas kthimit të saj, Rama do e bënte edhe një lajm me Ina Nukën, se duhet mbushur defteri i propagandës.