Pardje, 19 Mars, ishte afati i fundit për tre partitë (PS, PD, LSI) që kanë të drejtën e përfaqësimit me anëtarë në KZAZ-të, për të paraqitur emrat e tyre. Thirrjes së KQZ-së ju përgjigj vetëm PS, e cila dorëzoi listën me emrat e përfaqësuesve të tyre, kurse PD dhe LSI refuzuan.

Kështu për opozitën pas daljes nga parlamenti dhe dorëzimit të mandateve, duket se nëse nuk plotësohen kërkesat e saj, edhe zgjedhjet lokale të 30 Qershorit të jenë një farsë dhe ilegjitime.

Mungesën e komisionierëve opozitarë, Partia Socialiste nëpërmjet Taulant Ballës e konsideroi si një vendim të momentit dhe shpreson se do të reflektohet më vonë. Ai u deklarua dje gati i bindur, se opozita do të marrë pjesë në zgjedhjet e Qershorit.

Por sipas ligjit zgjedhor për këtë gjë tashmë është vonë, ndaj që të ndodhë kjo kërkohet një marrëveshje e madhe politike, e cila sipas qëndrimeve aktuale të Ramës dhe mazhorancës, ende nuk duket në horizont.

Tashmë është qartë se, PD-LSI, nuk i veçojnë zgjedhjet lokale nga paketa e madhe politike që kanë paraqitur; për një qeveri tranzitore pa Edi Ramën, e cila do të përgatiste legjislacionin e duhur për të bërë zgjedhje të lira lokale e të përgjithshme.

Nëse vazhdon situata njësoj dhe Rama do të ecë përpara pa opozitën duke refuzuar një zgjidhje me marrëveshje politike për t’i pranuar kandidatët pas afatit, sipas ligjit zgjedhor, KQZ, është e detyruar që të shpall thirrje publike për kandidatë të interesuar që s’vijnë nga partitë.

Dhe që Rama ka këtë plan e do të ecë në këtë rrugë janë dhënë, edhe sinjalet e para.

Menjëherë pas refuzimit të opozitës për të paraqitur emrat e vetë për anëtarët e KZAZ-ve, anëtari i mazhoranës në KQZ, Bledar Skënderaj, deklaroi për Tv Klan, se KZAZ-të mund të funksionojnë, edhe nëse PD-LSI, nuk do ketë përfaqësuesit e saj.

‘KQZ hap procedurën dhe i zëvendëson me anëtare nga shoqëria civile. Deri një muaj përpara zgjedhjeve mund t'i sjellin dhe komisionerët e zgjedhur nga KQZ zëvendësohen me përfaqësuesit politik’, tha Skënderaj.

Por çështja shtrohet, në radhë të parë, se a është e aftë dhe me integritetin e duhur e ashtuquajtura Shoqëri Civile në Shqipëri, që të luajë rolin dhe të përfaqësojë opozitën aktuale të bashkuar (PD-LSI, PDNJ, etj) e cila edhe në zgjedhjet e njollosura tashmë të vitit 2017, morri mbi 700 mijë vota?!

Si anëtarë të KZAZ-ve, PS ka 315; PD 225; LSI 90. Gjithsej janë 630 komisionierë në ZAZ dhe janë depozituar vetëm 315 emra nga PS.

Pra këta 315 emra do të dalin dhe propozohen nga ajo Shoqëri Civile, e cila në segmentet kryesore të saj, në të gjitha raportet ndërkombëtare, cilësohet ose si shumë e dobët, ose e komprometuar dhe e varur nga qeveria Rama.

Për ta bërë më të qartë se si kontrollohet Shoqëria Civile direkt nga kryeministri, mjaftojmë të kujtojmë se i ashtuquajturi ‘Gëbelsi i vogël i Ramës’, Endri Fuga, përveç këshilltari më i afërt i tij është edhe anëtar i Këshillit Mbikëqyrës të Agjencisë për Mbështetjen e Shoqërisë Civile.

Por krahas Fugës, anëtarë në këtë agjenci që shpërndan fonde për Shoqërinë Civile janë  edhe tre miq të vjetër të Fugës, jo vetëm në lëvizjen ‘Mjaft’; si Gelardina Prodani, Oltjon Muzaka dhe Majlinda Dhuka.

Tashmë nuk është sekret, që dhjetëra OJF, nuk janë gjë tjetër veçse shoqata fantazma të krijuara dhe menaxhuara nga një dorë e vetme (Endri Fuga) me synimin për të përfituar sa më shumë fonde e projekte, por edhe për tu gjendur në krah të planeve si ky i fundit i Ramës, me të cilin synon që të zëvendësojë opozitën zyrtare shqiptare, me të ashtuquajturën Shoqëri Civile.