Kompania e reklamave “Dixh-Print” është një prej dy kompanive që u shpallën fituese të tenderit gjysëm milionë dollarë të zhvilluar pak javë më parë nga Bashkia e Tiranës për të siguruar imazhin e Erion Veliajt edhe për tre vitet e ardhshme, nëse ai fiton zgjedhjet lokale.

Por, edhe nëse Veliaj rezulton humbës, “Dixhi-Print” dhe kompania e pajisjeve të fonisë, “Pro Sound” do të marrin fondet publike, falë bujarisë së tepruar të kryebashkiakut aktual të Tiranës.

Disa media shqiptare raportuar pak ditë më parë se “Prosound” është organizatore e Kongresit Elektoral të Partisë Socialiste, në të cilat u shpall ri-kandidimi i Erion Veliajt për një mandat tjetër në krye të Tiranës.

Sipas burimeve mediatike, ky aktivitet ka kushtuar rreth 500 mijë euro dhe, krahas “Prosound”, në organizimin e tij duhet të ketë qenë edhe “Dixhi-Print”, e cila është bashkë-fituese e tenderit për organizimin e eventeve të organizuara nga Bashkia e Tiranës.

Infrastruktura, teknika dhe posterat e Kongresit Elektoral të Partisë Socialiste janë realizuar, në pjesën më të madhe nga Bashkia e Tiranës, e cila ka shpenzuar fondet e mbledhura nga taksat e kryeqytetasve për të organizuar shoë-n gjigand për ri-kandidimin e “Lali Erit”.

Para këtij eventi, ‘Dixhi-Print” ka përfituar fonde nga Bashkia e Tiranës për organizimet e atyre që Veliaj i konsideronte si “dëgjesa publike” për buxhetin e kryeqytetit për vitin 2019, ose për daljet në “mensat sociale”, në rolin e një bamirësi për shtresat në nevojë.

Kushdo që i ka ndjekur këto aktivitete të Lali Erit, e ka të qartë që ato kanë shërbyer si një mjet propagande për të goditur opozitës apo edhe kundërshtarët politikë brenda Partisë Socialiste.

E, në këto aktivitete “butaforike” të Veliajt, ‘Dixhi-Print” ka qenë i pranishëm, duke përfituar fonde nga Bashkia e Tiranës për të siguruar dhe forcuar imazhin publik të Erion Veliajt.

Kompania “Dixhi-Print”, në fakt, nuk është aq e panjohur në tregun e reklamave. Ajo është krijuar në vitin 2007 dhe mori një hov sasior gjatë periudhës së “Rilindjes”.

“Boldnews.al” konsultoi të dhënat e publikuara në portalin informativ “spendingdata.al”, në të cilën pasqyrohen transaksionet e thesarit të shtetit, institucionet tenderuese dhe kompanitë fituese.

Në bazë të të dhënave publike, “Dixhi-Print” rezulton që të ketë përfituar rreth 1.3 miliardë lekë (të vjetra) tendera gjatë periudhës që drejton vendin qeveria e Partisë Socialiste, të drejtuar nga Edi Rama.

Në periudhën 2012-2013, kompania “Dixhi-Print” ka arkëtuar rreth 530 milionë lekë (të vjetra). Në bazë të të dhënave publike, pjesën më të madhe të këtyre fondeve, “Dixhi-Print” e ka fituar në pjesën e dytë të vitit 2013, kur “Rilindja” mori pushtetin.

Gjithnjë sipas “spendingdata.al”, kompania e reklamave “Dixhi-Print” ka fituar rreth 90 milionë lekë të vjetra.

“Dixhi-Print” ka vijuar të shpallet fitues tenderash publikë edhe në periudhën e mëtejshme. “Rilindja”, e cila e ka bazuar filozofinë e pushtetit të saj tek reklama, tek dukja, ka dorëzuar në arkën e “Dixhi-Print” rreth 630 milionë lekë të tjera, në periudhën 2015-2019.