Sekretari i përgjithshëm i P-së, Gazmend Bardhi ka dalë në një deklaratë urgjente nga selia e Partisë Demokratike.

Bardhi tha se kryeprokurorja e Tiranës Elisabeta Imeraj, po bën presion për të arrestuar Lulzim Bashën.

‘Elisabeta Imeraj po ushtron presion të paligjshëm mbi prokurorët e çështjes, ndonëse kryetari i opozitës ka konfirmuar vetë për tu paraqitur posa kjo e fundit të zbatojë ligjin.

Kjo është për të larguar vëmendjen nga përgjimet e reja të BILD.

PD paralajmëron Imerajn  se ky skenar kriminal do të dështojë.

Kamikazja Imeraj nuk do ta shpëtojë dot Edi Ramën’, tha ndër të tjera Bardhi.

Sipas Bardhit, kjo është një tentativë e Ramës për të hequr vëmendjen nga ‘bombat’ që do të publikojë gazeta e madhe gjermane ‘Bild’.

Deklarata e plotë e Gazmend Bardhit:

Me urdhër direkt të Edi Ramës, drejtuesja e Prokurorisë së Tiranës Elisabeta Imeraj në dhunim flagrant të ligjit po ushtron presion të paligjshëm ndaj prokurorëve të çështjes për shoqërimin me forcë dhe arrestimin e kryetarit të opozitës, ndonëse kryetari i opozitës ka konfirmuar vullnetin për tu paraqitur në prokurori sapo kjo e fundit të zbatojë ligjin për thirrjen e tij.

Ky presion kriminal përmes urdhrave të paligjshëm të prokurores së kapur Elisabeta Imeraj po ushtrohet me urdhër direkt të Edi Ramës me qëllim për të larguar vëmendjen nga përgjimet e reja që ka paralajmëruar se do të publikojë sot gazeta gjermane BILD.

Partia Demokratike paralajmëron prokuroren Imeraj dhe shefin e saj Edi Rama se ky skenar kriminal do të dështojë dhe ata do të jenë përgjegjës direkt për këtë veprim kriminal të paprecedentë të shkeljes së ligjit dhe provokimit ndaj opozitës.

Kamikazaja Imeraj nuk do ta shpëtojë dot Edi Ramën. Asgjë nuk e shpëton dot Edi Ramën. As drejtësia e kapur prej tij.