Pas arrestimeve në Mat dhe procedimeve në Berat, Policia njoftoi zyrtarisht se edhe në Kukës janë vënë në pranga 4 persona lidhur me incidentet në qytetin verior ditën e djeshme.

Ndryshe nga vendet e tjera ku pati përplasje, në Kukës, policia u tërhoq pas trazirave duke bërë vetë nxjerrjen nga gjimnazi “Havzi Nela” që përdoret si KZAZ, materialet zgjedhore.

Njoftimi i Policisë – Në lidhje me ngjarjen e ndodhur dje, më datë 19.06.2019, tek gjimnazi “Havzi Nela”, në KZAZ nr.11 Kukës, ku disa persona në bashkëpunim me njeri-tjetrin, kanë tentuar të dëmtojnë materialet zgjedhore, kanë prishur derën e palestrës dhe kanë vënë zjarr, si dhe kanë kundërshtuar punonjësit e policisë, pas veprimeve hetimore, specialistët për Hetimin e Krimit në Komisariatin e Policisë Kukës, bënë arrestimin në flagrancë të 4 shtetasve, konkretisht:

-A. C., 46 vjeç, banues në Kukës, shofer në Bashkinë e Kukësit.

-E. H., 42 vjeç,  banues në Kukës, shofer në Bashkinë e Kukësit.

-E. B., 26 vjeç , banues në Kukës, Inspektor i Policisë Bashkiake.

-E. M., 35 vjeç, banues në Kukës.

Janë shpallur në kërkim 7 shtetas, si dhe janë proceduar në gjendje të lirë 4 të tjerë, për veprën penale  “Organizimi i paligjshëm i tubimeve”.

Materialet për veprime të mëtejshme do t’i kalojnë Prokurorisë pranë Gjykatës së Rrethit Gjyqësor Kukës, në ngarkim të shtetasve të lartpërmendur, për veprat penale “Kundërshtimi i Punonjësit të Policisë së Rendit Publik”, “Mosbindja ndaj urdhrit të Punonjësit të Policisë së Rendit Publik”, “Shkatërrimi i pronës”, ”Dëmtimi me dashje i materialeve zgjedhore, e mbetur në tentative”, “Organizim i paligjshëm i tubimeve” dhe “Prishja e qetësisë publike”.

Tensione janë shënuar pardje dhe kanë ardhur në rritje ditën e djeshme në disa nga KZAZ e vendit. Nga bashkitë e opozitës është kërkuar lirimi i institucioneve që përdoren në kuadër të zgjedhjeve lokale të 30 qershorit, me argumentin se kjo datë është rrëzuar me dekretin e Presidentit Ilir Meta. Ndërkohë, KQZ, që ka mbështetjen e policisë, e quan anti-kushtetues vendimin e Metës. Forca policore janë vendosur në KZAZ dhe janë përplasur me qytetarët dhe punonjës së bashkive që kërkojnë lirimin e këtyre institucioneve nga materialet zgjedhore në zbatim të dekretit të Presidentit.