Në një prononcim për gazetaren, Klodiana Lala, në `News 24` avokati i ish-ministrit të Brendshëm Saimir Tahiri, Maks Haxhia, ka folur edhe për mesazhin “e koduar” të klientit të tij kundrejt kryeministrit, Edi Rama, të cilin në sallën e gjyqit e ka cilësuar; “shefi im i madh”.

“Shqipja është e bukur dhe e larmishme. Tahiri tha “si e keni hetuar ju prokurorët që jam unë shefi i madh”, në kontekstin që prokurorët s’kanë bërë hetim. Tahiri thotë “aq të apasionuar jeni për të më bërë me faj, sa thoni se unë jam shefi i madh, kur unë kam qenë në takime zyrtare, me Komisionierin dhe pastaj me Ramën”. Tahiri thotë që “në krim nuk jam unë shefi i madh, por në politikë shefi i madh dihet kush është”, ka shpjeguar gjithsesi me një gjuhë të disa kuptimtë Haxhia, deklaratën e Tahirit ku përfshin edhe kryeministrin.

Avokati i njohur gjithashtu është pyetur nga gazetarja, edhe për gjendjen shpirtërore të klientit të tij, i cili është parë gati duke lotuar në seancë.

“Nuk ishte në lot, ai ka dhënë mandatin për këtë, ka treguar se është burrë. Ishte një gjendje emocionale, sepse vihet në rrezik jeta e tij. Në vend që të vlerësohej për punën si ministër, ai vihet përballë akuzave, kur nuk ka asnjë provë. Të gjykosh ish-ministrin për vepra tepër të rënda, pa asnjë provë, është të ulërasësh, të hipësh mbi tavolina. Me aq sa e njoh dosjen dhe e njoh shumë mirë, nuk e di ku gjykata, në rast çmendurie, do ta gjejë një provë të vetme”, ka thënë mbrojtësi ligjor i Tahirit në këtë prononcim menjëherë pas seancës së sotme, e cila do të mbyllet në orën 16.00 me vendimin e trupës gjykuese.