Nga Arjan Lika
Situata në qytetin tonë rëndohet dita ditës.
Ka një degradim të frikshëm të rendit e sigurisë në qytetin tonë. Rastet e krimit janë shtuar. Qytetarët të frikësuar denoncojnë akte kriminale me përdorim armësh dhe përpjekje për rrëmbim personi në qytet. Policia e shtetit në vend që të zbulojë e ndëshkojë autorët e këtyre akteve hesht ose përpiqet “të rregullojë punët” me autorët.
Papunësia ka kapur për fyti çdo familje matjane.
Mungesa e kushteve më minimale jetike detyrojnë qindra të rinj matjanë të largohen nga vatrat e tyre familjare në emigrim.
Gjendja e shkollave është e mjerë. Shërbimet shëndetësore të rënduara nga mungesa e investimeve njerëzore dhe kushteve të qendrave shëndetësore.
Papunësia është mbytëse.
Biznesi vuan nga gjobat e taksat e pushtetit dhe shumë prej tyre janë në prag falimentimi.
Spastrimet politike vazhdojnë dhe lista të tjera qytetarësh që do të hidhen në rrugë po përgatiten.
E gjitha kjo situatë e degraduar në qytetin tonë nuk mund të mbulohet me bojën e fasadave apo mbi stola.
Këshilli Bashkiak monist totalisht nën diktatin politik është kthyer në një noter symbyllur i shkeljes së ligjit, cënimit të pronës publike në favor të klienteve të pushtetit.
Tashmë për çdo qytetar matjanë është e qartë, ky pushtet është në degradim të përditshëm. Asnjë rrugë dalje nuk ka nga kjo situatë përveçse duke rikthyer standartet demokratike të qeverisjes përmes zgjedhjeve të reja të lira e të ndershme.
Qyteti ynë nuk mund të ngelet peng i varfërisë, abuzimit të pushtetit, krimit dhe oligarkëve.
