Edi Rama mungoi sot në një aktivitet të PS-së së Tiranës, kur në mëngjes u njoftua se kryeministri do të ishte i pranishëm. Burimet flasin për probleme shëndetësore të kreut të qeverisë, i cili së fundmi ka munguar në disa ngjarje të njoftuara

Vetë Edi Rama e argumentoi mungesën duke thënë se kishte pasur një mbledhje pune për një ligj special kundër KCK-së. Teksa Elisa Spiropali po kërkonte një mandat të tretë kryeministror për të, Edi Rama nuk doli përpara strukturave të PS-së për qarkun Tiranë.

Simpatizantët ishin njoftuar për takim me kryeministërin, sic tregohet në poster, e po ashtu, në orën 9 të mëngjesit të kësaj të shtune, edhe media u njoftua për aktivitet më praninë e Edi Ramës.

Por… ai nuk erdhi. Burime pranë kryeministrit flasin për probleme shëndetësore të Edi Ramës, të cilat së fundmi e kanë kushtëzuar nga disa veprimtari publike të parashikuara.

Erion Veliaj, që mori timonin e partisë në mungesë të Ramës, tha se kryeministri ishte duke i ndjekur. Por Edi Rama njofton se nuk ka qenë përpara TV duke pritur përshëndetjen e militantëve, por duke punuar.

“Kur dal përditë, pse del përditë, pse del përditë, kur s’dal ca ditë, çfarë ka që s’del përditë, historia e vjetër hip se të vrava, zbrit se të vrava. Sot e kam nisur ditën me grupin e punës për Ligjin Special kundër krimit të organizuar+masat kundër KÇK që po finalizohen në letër”.

Ky reagim ngre disa pikëpyetje:

-A nuk e dinte zyra e shtypit e PS-së që Rama kishte takim për KÇK-në në mëngjes që njoftoi se kryeministri do të vinte tek takimi i partisë?

-Kush është në grupin e punës së kryeministrit për ligjin kundër gjyqtarëve e prokurorëve abuzivë, kur të gjithë deputetët socialistë të ligjeve ishin në takimin e partisë?

Kjo nuk hera e parë që Rama mungon në një aktivitet publik.

Ai nuk e takoi presidentit maqedonas Pendarovski, dhe zyra e këtij të fundit njoftoi se Rama e anuloi për arsye shëndetësore. Po ashtu, Rama nuk mori pjesë të hënën në interpelancën parlamentare për Alvin Berishën, dhe pse Gramoz Ruçi e kishte  vendosur në rend dite.

Njëlloj si sot në strukturat e Tiranës, të mërkurën Rama mungoi dhe në takimin me strukturat e qarkut Elbasan./abcnews.al