Presidenti i Republikës, Ilir Meta, ka deklaruar sot se Shqipëria mbështet iniciativën e SHBA për krijimin e Aleancës Ndërkombëtare të Lirisë Fetare.

Deklarata u bë në konferencën “Feja si Instrument për Paqen”, të organizuar nga Presidenti në bashkëpunim me Shtetet e Bashkuara të Amerikës

Teksa Meta vlerësoi maksimalisht rolin që kanë luajtur bashkësitë fetare në Shqipëri, njëzëri të bashkuara për integrimin e vendit dhe në luftën kundër terrorizmit, nxori në pah nevojën për të siguruar stabilitet politik në Shqipëri dhe në vendet e rajonit për t’u krijuar siguri popujve

Meta tha: “Shqipëria përshëndet dhe mbështet iniciativën e SHBA dhe planet e Sekretarit Amerikan të Shtetit, Pompeo, për krijimin e Aleancës Ndërkombëtare të Lirisë Fetare, një aleancë e kombeve me të njëjtën mendje, të përkushtuar për të luftuar persekutimin fetar në të gjithë botën".

"Të gjitha shtetet në rajonin tonë i janë bashkuar koalicionit global kundër terrorizmit, por ne duhet të sigurojmë një stabilitet politik për secilin nga vendet tona në rajonin tonë, në mënyrë që t’u krijojmë siguri popujve tanë dhe të arrijmë zhvillimin e ekonomive, por edhe të mos lejojmë shfaqjen e çdo ekstremizmi fetar, diplomacinë e butë nga faktorët e tretë dhe ndikimin e huaj negativ".

"Sot vendi ynë përballet me rastet e rënda të të mbeturve në Siri si ai i Alvin Berishës. Por ka dhe me dhjetëra kampe të tjera ku ndodhen shqiptarë dhe këta duhet të rehabilitohen, të mbrohen, të përkrahen, të integrohen në shoqëritë tona.”