Thirrjet “Rama ik” nga tribunat e stadiumit “Air Albania” ndoshta ishin e vetmja surprizë për organizatorët e spektaklit që parapriu takimin mes Shqipërisë dhe Francës. E ndërsa për spektaklin e dhuruar, pavarësisht kritikave të shumta, mund të ishin harxhuar orë e javë për t’a kuruar deri në detaje, thirrjet “Rama ik” që nisën nga tribuna përballë asaj VIP dhe u shpërndanë në të gjithë stadiumin mund të cilësoheshin si qershia mbi tortë.

Qytetarë, që ndoshta e kishin menduar një veprim të tillë, por që masiviteti që morën ovacionet ishin një spektakël më vete.

Thirrje të ngjashme me ato të vitit ’90 në Kavajë, Tiranë apo Shkodër, kundër komunizmit, që spontanisht u përhapën kudo në Shqipëri.

Gazetari dhe aktivisti i shoqërisë civile, Aulon Kalaja në një postim në rrjet shkruan se “thirrja “Rama Ik”, iu doli nga shpirti!”

“Mjaftoi nje shkendije dhe i gjithe stadiumi në sintoni të plotë kërkoi largimin e Kryeministrit Rama.

U ndjeva mirë që isha në stadium dhe isha dëshmitar i kësaj thirrje, pasi në Kavajë në vitet ’90, nuk kam qenë prezent për të dëgjuar thirrjet “Poshtë Komunizmi dhe Liri Demokraci””, shkruan Kalaja.