Paraditen e kësaj të enjteje një grup studentësh të vetëquajtur “Rezistenca Rinore” janë mbledhur para godinës së kryeministrisë për të protestuar. Protesta e tyre lidhet me ligjin e censurës të medias nga qeveria që u miratua ditën e djeshme në Kuvend.

Me pankarta në duar, ata i kërkojnë qeverisë të ndalë censurimin e mediave kritike. Herë pas herë brohorasin: “Turp!” apo “Ndal censurës ndaj medias!”.

Të rinjtë kanë lidhur gojën me shami të zeza ku lexon “Gjobë”. Ndërkohë që siç e shihni dhe në foto kane hedhur disa televizorë të thyer dhe pranga mbi to.

Kuvendi miratoi dje me 82 vota pro këtë paketë ligjore për të cilën kryeministri Edi Rama thotë se do të luftojë shpifjet në median online. Vetëm 13 deputetë u shprehën kundër kësaj pakete, 5 abstenuan dhe 5 deputetë nuk morën pjesë në votim.

Por sipas gazetarëve, të cilët e kanë kritikuar fort, kjo paketë ligjore nuk i jep zgjidhje lajmeve të rreme dhe shpifjeve, siç pretendon qeveria, por është përpjekje për të kapur median online. Në të parashikohet që Autoriteti i Mediave Audiovizive (AMA) të marrë kompetenca deri në mbylljen e portaleve, nëse gjykon se ka publikuar lajme të rreme apo shpifje. Ndërkohë, kundërshtarët e paketës theksojnë se ky vendim mund të merret vetëm nga Gjykata dhe se asnjë institucion tjetër nuk mund të marrë kompetencat që i takojnë drejtësisë.