Shqipëria mori kryesimin e OSBE dhe disa meme online sugjerojnë se tashmë kryeministri Edi Rama mund të pranojë lirshëm se është ‘lider global’.
“Do i japim prioritet dialogjeve politike mes liderëve. Do luftojmë krah aleancës për një botë më të mirë. Do kem parasysh çdo gjë që ju thoni, do dëgjojmë me vemendje çdo sugjerim”, tha Rama, në një kohë kur vetë Shqipëria është në një krizë të thellë demokratike.
Por ajo që ra në sy në këtë konferencë ishte paraqitja e Edi Ramës me emërtimin ‘kryeministër dhe ministër për Europën dhe Punët e Jashtme të Shqipërisë’. Kaq e gjatë ishte tabela përpara Ramës, sa nuk u kalua pa komente në rrjetet sociale, në një kohë kur Gent Cakaj mbante përpara thjesht një letër ku shkruhej: Shqipëria.
Më vonë, vetë Cakaj postoi një mesazh në FB. “Sot në Këshillin e Përhershëm me Kryetarin në Detyrë të OSBE, z. Edi Rama, për të prezantuar prioritetet e Kryesisë së Shqipërisë 2020”, shkruan ai.
E kështu, ‘ministri në detyrë’ e bëri Ramën ‘kryetar në detyrë’. Kjo rrëshqitje frojdiste ka lidhje me faktin se Rama nuk po e prezanton më Cakajn as si ministër në detyrë. Por natyrisht ka lidhje edhe me përkthimin. Rama është kryetar ‘in office’, kurse Cakaj është ‘acting minister’.
Në disa media është raportuar se mes Ramës dhe Cakajt ka fërkime. Lapsi.al shkon edhe më larg kur shkruan se Cakaj mund të shkarkohet.
Këto nuk kanë shumë rëndësi. Për momentin, Shqipëria ka marrë përsipër që ta bëjë prioritet të saj çështjen e konfliktit në Ukrainë. Por një ditë më parë, Syri.net raportoi për një histori që tregon sesa qesharak është shteti dhe qeveria shqiptare.
Pasi kemi marrë angazhimin për të ngritur një mision në Ukrainë, qeveria ka dërguar para disa ditësh emrin e diplomatit që do drejtojë misionin dhe kërkesën për vizë diplomatike. Por Kievi është përgjigjur se nuk mund të japin vizë... pa u bërë më parë kërkesa për hapjen e misionit.
